ខ្យល់កន្ត្រាក់រលំផ្ទះសង្កត់ក្មេងប្រុសម្នាក់ស្លាប់នៅខេត្តសៀមរាប

ក្មេងប្រុសអាយុ៥ម្នាក់ត្រូវផ្ទះរលំសង្កត់ពីលើបណ្ដាលឲ្យស្លាប់ភ្លាមៗ ខណៈដែលមានភ្លៀងលាយឡំជាមួយខ្សល់កន្ត្រាក់និងបណ្ដាលឲ្យខូចខាតផ្ទះមួយខ្នង។

ករណីខ្យល់កន្ត្រាក់បណ្ដាលឲ្យមានមនុស្សស្លាប់នេះ បានកើតឡើងកាលពីវេលាម៉ោ១៦និង៣០នាទី ថ្ងៃទី០៧ ខែមីនា ឆ្នាំ២០២២ នៅចំណុចផ្ទះរបស់ឈ្មោះ កី ពក ភូមិខ្នាក្រៅ ឃុំកន្ទួត ស្រុកស្វាយលើ ខេត្តសៀមរាប ។

ក្មេងប្រុសរងគ្រោះបានមានឈ្មោះ ឡូយ សូរិយា ភេទប្រុស កើតថ្ងៃ១០ ខែមិថុនា ឆ្នាំ២០១៧ ទីលំនៅបច្ចុប្បន្នភូមិខ្នារក្រៅ ឃុំកន្ទួត ស្រុកស្វាយលើ ខេត្តសៀមរាប ។

សមត្ថកិច្ចបានបញ្ជាក់ថា យោងតាមការបំភ្លឺពីសាក្សី(ម្ដាយជនរងគ្រោះ) និងការពិនិត្យកន្លែងកើតហេតុរបស់កម្លាំងជំនាញបានសន្និដ្ឋានថា ជនរងគ្រោះគឺស្លាប់ដោយសារផ្ទះដួលរលំសង្កត់ពិតប្រាកដមែន ។

ក្រោយការពិនិត្យ និងធ្វើកំណត់ហេតុរួច សមត្ថកិច្ចបានប្រគល់សពជូនសាច់ញាតិដើម្បីយកទៅធ្វើបុណ្យតាមប្រពៃណី៕