សន្តិសុខសង្គម

វាយប្លន់ជនបរទេសយកគ្រឿងអលង្ការនិងលុយសរុបប្រហែល១០ម៉ឺនដុល្លារ នៅសួនច្បារមាត់ទន្លេ

បានផុស

៥ ខែ មុន

នៅ

ថ្ងៃព្រហស្បតិ៍ ២៣ មិថុនា ២០២២

ដោយ

ជនបរទេសជាជនជាតិជប៉ុនម្នាក់ ត្រូវបានជនសង្ស័យមួយក្រុមធ្វើសកម្មភាពវាយប្លន់យកគ្រឿងអលង្ការ និងប្រាក់មួយចំនួនសរុបប្រហែល១០ម៉ឺនដុល្លារ តែត្រូវបានកម្លាំងសមត្ថកិច្ចចាប់ខ្លួនបានម្នាក់យកទៅសួរនាំ។

ករណីវាយប្លន់នេះ បានកើតឡើងកាលពីវេលាម៉ោង៣និង៥០នាទីទៀបភ្លឺ ថ្ងៃទី២៣ ខែមិថុនា ឆ្នាំ២០២២ នៅចំណុចសួនច្បារមាត់ទន្លេ តាមបណ្ដោយមហាវិថីព្រះស៉ីសុវត្ថិ កែងផ្លូវ១៣៦ សង្កាត់ផ្សារកណ្តាលទី១ ខណ្ឌដូនពេញ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនរងគ្រោះជាបុរសជនជាតិជប៉ុន មិនទាន់ស្គាល់អត្តសញ្ញាណ មានវ័យជាង៣០ឆ្នាំ បាត់បង់ទ្រព្យសម្បត្តិរួមមាន ខ្សែកពេជ្រ០១ខ្សែ នាឡិកាមួយខ្សែ ចិញ្ចៀនពេជ្រ ០១វង់ និងលុយមួយចំនួន។ ជនរងគ្រោះប្រាប់ថា ខ្សែកមានតម្លែជិត០៦ម៉ឺនដុល្លារ ឯនាឡិកាមាស ដាំពេជ្រ ម៉ាកRolex តម្លៃជាង០៤ម៉ឺនដុល្លារ។

លោកវរសេនីយ៍ឯក ទៀង ច័ន្ទសារ អធិការនៃអធិការដ្ឋានគរបាលខណ្ឌដូនពេញ បានប្រាប់ឲ្យដឹងនៅព្រឹកថ្ងៃទី២៣ ខែមិថុនា នេះថា ពិតជាមានករណីនេះពិតប្រាកដមែន ដែលក្រុមជនសង្ស័យបានធ្វើសកម្មភាពមានគ្នាពីរនាក់ តែត្រូវបានឃាត់ខ្លួនម្នាក់ហើយ និងកំពុងសួរនាំដើម្បីស្រាវជ្រាវរកបក្ខពួកម្នាក់ទៀត។

លោកវរសេនីយ៍ឯក ទៀង ច័ន្ទសារ បានបន្ថែមថា ចំពោះសម្ភារៈបាត់បង់ គឺបាត់ខ្សែកមួយខ្សែ តែលោកមិនបានបញ្ជាក់លំអិតនៅឡើយទេរឿងតម្លៃ ដោយលោកបានបញ្ជាក់ថា រង់ចាំការស្រាវជ្រាវឲ្យលំអិតសិន៕

អត្ថបទ ៖ សុខុម