ចាប់ខ្លួនអ្នកជួញដូរសត្វពង្រូលម្នាក់ក្នុងក្រុងច្បារមន

កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តកំពង់ស្ពឺ បានធ្វើការបង្ក្រាប់ និងឃាត់ខ្លួនជនសង្ស័យម្នាក់ ខណៈកំពុងជួញដូរសត្វពង្រូលនៅក្នុងភូមិសាស្ត្រក្រុងច្បារមន។

ករណីបង្ក្រាបនិងឃាត់ខ្លួនជនសង្ស័យដែលជួញដូរសត្វព្រៃនេះ បានធ្វើឡើងកាលពីវេលា​ម៉ោង១១​ព្រឹក​ ថ្ងៃទី៣១ ខែកក្កដា ឆ្នាំ២០២២ ស្ថិតក្នុងភូមិក្រាំងពលទេព សង្កាត់រកាធំ ក្រុងច្បារមន ខេត្តកំពង់ស្ពឺ។

សមត្ថកិច្ចបានអោយដឹងថា ជនសង្ស័យដែលឃាត់ខ្លួនមានឈ្មោះ ទុំ ភ័ក្រ ភេទប្រុស អាយុ៣៨ឆ្នាំ រស់នៅភូមិពោធិមាស ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ។ ការឃាត់ខ្លួននេះ គឺធ្វើឡើង ខណៈដែលជនសង្ស័យកំពុងប្រព្រឹត្តបទល្មើសជាក់ស្តែង ចាប់យកបានសត្វពង្រូលព្រៃចំនួន៥ក្បាល មានទង្ងន់ជាង២០គីឡូក្រាម។

ក្រោយពីឃាត់ខ្លួន ជនសង្ស័យត្រូវបានកម្លាំងបញ្ជូនមកស្នងការដ្ឋាននគរបាលខេត្តកំពង់ស្ពឺ ដើម្បីសាកសួរ ចំណែកវត្ថុតាងបានយកមករក្សាទុកនៅស្នងការដ្ឋាន​ដើម្បីរង់ចាំប្រគល់ជូនរដ្ឋបាល​ព្រៃឈើបន្តនីតិវិធី​៕

អត្ថបទ៖ សុខុម