ព័ត៌មានលំអិត ករណីផ្ទុះអាវុធក្នុងធនាគារ CIMB BANK គឺផ្ដើមចេញពីទំនាស់រវាងមន្ត្រីយោធា និងសន្តិសុខដែលយាមនៅគោលដៅជាមួយគ្នា

ករណីផ្ទុះអាវុធនៅក្នុងធនាគារ CIMB BANK នៅតាមបណ្ដោយផ្លូវ៥១៦ ក្នុងសង្កាត់បឹងបកក់១ ខណ្ឌទួលគោក កាលពីរសៀលថ្ងៃទី៧ ខែកញ្ញា នេះ គឺផ្ដើមចេញពីទំនាស់រវាងមន្ត្រីយោធា និងសន្តិសុខដែលយាមនៅទីតាំងកើតហេតុ។

ព័ត៌មានពីកន្លែងកើតហេតុបានឲ្យដឹងថា ជនសង្ស័យដែលផ្ទុះអាវុធបណ្ដាលឲ្យសន្តិសុខម្នាក់រងរបួសនោះ​ គឺជាមន្ត្រីយោធាដែលយាមនៅកន្លែងកើតហេតុ ចំណែកជនរងគ្រោះគឺជាសន្តិសុខយាមនៅគោលដៅនោះជាមួយគ្នា។ ចំពោះមូលហេតុរហូតមានការផ្ទុះអាវុធនេះ ដោយសារជនរងគ្រោះជាសន្តិសុខចូលបន្ទប់ទឹក ហើយមន្ត្រីយោធាដែលផ្ទុះអាវុធនោះ ឲ្យជនរងគ្រោះដោះមួកចេញ តែជនរងគ្រោះមិនដោះ ក៏ផ្ដើមជាទំនាស់ពាក្យសម្ដីរហូតធ្វើឲ្យមន្ត្រីយោធាផ្ទុះអាវុធមួយគ្រាប់ បណ្ដាលឲ្យជនរងគ្រោះរងរបួសភ្លៅខាងស្ដាំ និងបានបញ្ជូនទៅសង្គ្រោះភ្លាមៗ។

ប្រភពបានបន្តថា ក្រោយពីផ្ទុះអាវុធរួច ជនដៃដល់ជាមន្ត្រីយោធាបានគេចខ្លួនបាត់ពីកន្លែងកើតហេតុ។ ទោះបីយ៉ាងណា កម្លាំងនគរបាលខណ្ឌទួលគោក បានសហការណ៍ជាមួយកម្លាំងអាវុធហត្ថ ចុះដល់ទីតាំងកើតហេតុ ដើម្បីធ្វើការស្រាវជា្រវឈានដល់ការចាប់ខ្លួនជនដៃដល់យកមកផ្ដន្ទាទោសតាមផ្លូវច្បាប់៕