សន្តិសុខសង្គម

ឃើញម្ចាស់ផ្ទះមិនចាក់សោ ចូលលួចទ្រព្យសម្បត្តិ គេចខ្លួនបាន ២ ថ្ងៃ ជាប់ខ្នោះ

បានផុស

១ year មុន

នៅ

ថ្ងៃសុក្រ ២១ តុលា ២០២២

ដោយ

មុខសញ្ញាចោរដៃឆើតម្នាក់ ត្រូវបាននគរបាលខណ្ឌច្បារអំពៅចាប់ខ្លួន កាលពីយប់ថ្ងៃទី ២០ ខែតុលាពាក់ព័ន្ធករណីចូលលួចគ្រឿងអលង្ការ ខណៈម្ចាស់ផ្ទះមិនចាក់សោផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនសង្ស័យមានឈ្មោះ ពេជ្រ រស្មី ភេទប្រុស អាយុ ២៩ ឆ្នាំ ស្នាក់នៅភូមិជ្រោយអំពិល សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ។

តាមប្រភពពីជនរងគ្រោះឈ្មោះ បួន ចាន់នី ភេទស្រី អាយុ ៥៤ ឆ្នាំ មុខរបរលក់ដូរ ស្នាក់នៅផ្ទះកើតហេតុភូមិជ្រោយអំពិល ២ សង្កាត់ក្បាលកោះ ខណ្ឌច្បារអំពៅ រាជធានីភ្នំពេញ បានប្រាប់នគរបាលថា កាលពីវេលាម៉ោង ២ រសៀល ថ្ងៃទី ១៨ ខែតុលា គាត់ចេញទៅលក់នៅផ្សារក្បែរផ្ទះដោយភ្លេចចាក់សោផ្ទះ។ ពេលព្រលប់ថ្ងៃដដែល គាត់ត្រឡប់មកផ្ទះវិញ ក៏ស្រាប់តែឃើញអីវ៉ាន់ក្នុងផ្ទះ ត្រូវគេរើកកាយ ហើយបើកទូឃើញបាត់ខ្សែក ប្លាទីន ១ ខ្សែ ខ្សែជើងប្លាទីន ១ ខ្សែ ក្រវិលដាំត្បូងពណ៌ស ១ គូ និងបន្តោងដាំត្បូងចំនួន ១។

ជនរងគ្រោះបន្តថា បន្ទាប់ពីបាត់របស់ក្នុងផ្ទះរួចមក គាត់បានទៅដាក់ពាក្យបណ្ដឹងនៅស្នាក់ការនគរបាលប៉ុស្តិ៍ក្បាលកោះ។ រហូតដល់យប់ថ្ងៃទី ២០ ខែតុលា នគរបាលចាប់ខ្លួនមុខសញ្ញាលួចខាងលើ ដោយរកឃើញវត្ថុតាងដែលលួចបានទាំងអស់។

ជនសង្ស័យ ពេជ្រ រស្មី សារភាពថា ខ្លួនពិតជាបានចូលលួចទ្រព្យសម្បត្តិរបស់ជនរងគ្រោះប្រាកដមែន។ ក្នុងនោះ ដោយសារតែឃើញម្ចាស់ផ្ទះមិនចាក់សោ ទើបខ្លួនចូលលួចបាន៕

អត្ថបទ ៖ នរា