អាជ្ញាធរចុះផ្អាកការសាងសង់វីឡាមួយកន្លែងរំលោភលើចិញ្ចើមផ្លូវ

សំណង់ផ្ទះវីឡាមួយកន្លែងស្ថិតនៅក្នុងភូមិព្រែកតាឡុង១ សង្កាត់ចាក់អង្រែក្រោម ខណ្ឌមានជ័យរាជធានីភ្នំពេញ ត្រូវអាជ្ញាធរខណ្ឌមានជ័យចុះផ្អាកការសាងសង់ដោយសារតែមានបណ្តឹងពីប្រជាពលរដ្ឋរស់នៅក្បែខាងចោទពីបទរំលោភដីចិញ្ចើមផ្លូវ។

លោក ជា សុខៃ ចៅសង្កាត់ចាក់អង្រែក្រោមបានឲ្យដឹងនៅថ្ងៃទី ៧ ខែធ្នូនេះថា កាលពីថ្ងៃទី ៣ ខែធ្នូកន្លងទៅនេះកម្លាំងចម្រុះរបស់សាលាខណ្ឌមានជ័យដឹកនាំដោយលោក សេង គន្ធ អភិបាលរងខណ្ឌ និងលោក ជា វង្សចិន្តា ប្រធានភូមិបាលខណ្ឌមានជ័យព្រមទាំងតំណាងសង្កាត់ចាក់អង្រែក្រោមលោកមេភូមិព្រែកតាឡុង១ បានចុះទៅផ្អាកការសាងសង់ផ្ទះវីឡាមួយកន្លែងស្ថិតក្នុងភូមិព្រែកតាឡុង១ដែលមានម្ចាស់ឈ្មោះ ជា ដារ៉ា ដោយសំណង់ខាងលើ​សាងសង់ខុសច្បាប់។

លោកចៅសង្កាត់បានបញ្ជាក់ថា ករណីខាងលើនេះក៏មានការបញ្ជារផ្ទាល់ពីលោក កើត ឆែ អភិបាលរង រាជធានីភ្នំពេញបានឲ្យកម្លាំងចម្រុះចុះត្រួតពិនិត្យនៅការដ្ឋានខាងលើដោយក្នុងនោះក៏មានពាក្យបណ្តឹងពីប្រជាពលរដ្ឋដែលមានលំនៅដ្ឋានក្បែនឹងសំណង់ផ្ទះវីឡានេះដែរ។

ក្នុងនោះកម្លាំងចម្រុះបានធ្វើកំណត់ហេតុផ្អាកការសាងសង់ដោយពុំមានវត្តមានម្ចាស់ផ្ទះឡើយ។ ក្នុងកំណត់ហេតុបានបញ្ជាក់ថា ការសាងសង់ផ្ទះវីឡាខាងលើគឺសាងសង់លើចំណីផ្លូវ១ចុច៦០ម៉ែត្រ និងបណ្តោយ១៩ ម៉ែត្រផងដែរ។ហើយសំណុំរឿងផ្អាកការសាងសង់និងត្រូវបញ្ជូនទៅកាន់រដ្ឋបាលខណ្ឌមានជ័យនាថ្ងៃទី៣ខែធ្នូនោះ៕

អត្ថបទ៖ នរា