សពបុរសម្នាក់ត្រូវបានគេទះឃើញសល់តែគ្រោងឆ្អឹង ខណៈសមត្ថកិច្ចជំនាញបញ្ជាក់ថា ជាអំពើឃាតកម្ម

ក្រោយការត្រួតពិនិត្យទៅលើគ្រោងឆ្អឹងរបស់សាកសពដែលបានបាត់ខ្លួនចេញពីផ្ទះចំនួន៤១ថ្ងៃ សមត្ថកិច្ចបានបញ្ជាក់ថា គឺជាអំពើឃាតកម្ម ដោយបានសម្លាប់រួចយកមកប្លុងចោលលើដីចម្ការដែលគ្មានមនុស្សឆ្លងកាត់។

គួរបញ្ជាក់ថា សពយុវជនម្នាក់ត្រូវបានម្ចាស់ចម្ការដំឡូងប្រទះឃើញដេកស្លាប់នៅកណ្តាលចម្ការ ដោយសល់តែគ្រោងឆ្អឹង ក្រោយពីក្រុមគ្រួសារបានអះអាងថា បានបាត់ពីផ្ទះជាង៤០ថ្ងៃ រួចមក។

ហេតុការណ៍នេះបានភ្ញាក់ផ្អើលកាលពីរសៀលថ្ងៃទី១០ ខែធ្នូ ឆ្នាំ២០២២ ស្ថិតក្នុងចម្ការដំឡូងក្បែរជើងភ្នំវែង ក្នុងភូមិអូរល្ហុង ឃុំអូររំដួល ស្រុកភ្នំព្រឹក ខេត្តបាត់ដំបង ដោយសភាពសពដែលគេប្រទះឃើញគឺសល់តែគ្រោងឆ្អឹង និងបាត់ប្រអប់ដៃ ប្រអប់ជើងទាំងសងខាង ដោយបានដេកស្លាប់ក្បែរនឹងដុំថ្មដ៏ធំមួយ ។

បើតាមការរៀបរាប់ពីឪពុកម្តាយរបស់សព បានបញ្ជាក់ថា កូនប្រុសរបស់គាត់មានឈ្មោះ យុន រីណា អាយុ២៨ឆ្នាំ រស់នៅភូមិភ្នំតូច ឃុំពេជ្រចិន្តា ស្រុកភ្នំព្រឹក មានមុខរបរដឹកត្រីដើរលក់តាមភូមិ និងមានគូរដំណឹងរួចហើយដែរនៅតែថ្ងៃចូលរោងការតែប៉ុណ្ណោះ។

លោកបានបន្តថា កូនរបស់គាត់បានបាត់ខ្លួនតាំងពីយប់ថ្ងៃទី៣១ ខែតុលា មកម្ល៉េះ ដោយមិនដឹងជាទៅទីណា ដោយ​ឡែកម៉ូតូ លុយកាក់ និងគ្រឿងអលង្កា គឺកូនគាត់ទុកនៅក្នុងបន្ទប់ដេកទាំងអស់ គឺយកតែទូរស័ព្ទមួយគ្រឿងតាមខ្លួនប៉ុណ្ណោះប៉ុន្តែក្រោយមកក៏តេលែងចូលរហូត។ ដោយឡែកនារីដែលជាគូដណ្តឹងក៏បាននិយាយថា នៅថ្ងៃទី៣១ ខែតុលា វេលាម៉ោងជិត១២យប់ គាត់តេទៅលេងខ្លួនបានមួយភ្លែតរួចហើយក៏បាត់រហូតតែម្តង។

តាមការរៀបរាប់ពីម្ចាស់ចម្ការបានអោយដឹងថា ដោយសារតែភ្លៀងធ្លាក់ញឹកញាប់ពេកធ្វើអោយគាត់ត្រូវអាក់ខានមិនបាន​មកបាញ់ថ្នាំស្មៅរាប់ខែ ទើបមិនបានដឹងថាមានមនុស្សស្លាប់នៅក្នុងចម្ការបែបនេះ ហើយម៉្យាងទៀត ភូមិសាស្ត្រនេះមិនងាយអ្នកណាចូលមកដល់ណាស់ ព្រោះផ្លូវតូចមានសភាពលំបាកក្នុងការធ្វើដំណើរ ម៉្យាងវិញទៀតពីផ្ទះជនរងគ្រោះមកដល់កន្លែងកើតហេតុមានចម្ងាយជាង២០គីឡូម៉ែត្រឯណោះ ។

នៅក្នុងករណីនេះដែរ ក្រោយពីកម្លាំងសមត្ថកិច្ចជំនាញនៃការិយាល័យបច្ចេកទេស និងកោសល្យវិច្ច័យចុះទៅពិនិត្យ គឺបានសង្គេតឃើញថា ករណីនេះគឺជាអំពើឃាតកម្មយ៉ាងពិតប្រាកដ ព្រោះឆ្អឹងភ្លៅខាងស្តាំរបស់ជនរងគ្រោះត្រូវបានបាក់ និងបែកជាបំណែក ដោយឡែកស្លាកស្នាមដទៃទៀត មិនអាចមើលដឹងឡើយដោយសារតែសពជនរងគ្រោះក្រៀមស្វិតនៅសល់តែឆ្អឹងទៅហើយ៕

អត្ថបទ៖ សោ និយមរ័ត្ន