ព័ត៌មានបឋម៖ រកឃើញមនុស្សស្លាប់ ១០ នាក់ និងរបួស ៣០ នាក់ក្នុងហេតុការណ៍ឆេះកាស៊ីណូនៅប៉ោយប៉ែត

យ៉ាងហោចណាស់មនុស្សចំនួន ១០ នាក់ ត្រូវបានរកឃើញស្លាប់ និង៣០ នាក់រងរបួស ក្នុងករណីអគ្គិភ័យឆេះកាស៊ីណូ Grand Diamond City នៅសង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ។

របាយការណ៍បឋមបង្ហាញថា មកដល់ម៉ោងនេះ ស្ថានភាពអគ្គិភ័យនៅ​មិនទាន់​​រលត់​ជា​ស្ថាពរ​នៅ​ឡើយ​ទេ​ ខណៈកងកម្លាំង​អន្តរាគមន៍​បង្ការ​ពន្លត់​អគ្គិភ័យ​ និងសង្គ្រោះ​ កំពុង​តែ​ជួយ​អន្តរាគមន៍​ពន្លត់​យ៉ាង​យក​ចិត្ត​ទុក​ជាមួយ​ភាគី​ខាង​ប្រទេស​ថៃ​ដែល​ជាប់​ព្រំដែន​ជាមួយ​ភាគី​ប្រទេស​កម្ពុជា​។

ចំណែកឯមនុស្សដែលកំពុងជាប់នៅលើអគារត្រូវបានជួយសង្គ្រោះមកខាងក្រៅខ្លះ ហើយនៅមានមនុស្សជាប់នៅតាមបន្ទប់ក្រុមសង្គ្រោះកំពុងបន្តរុករកចូលទៅជួយ។

កម្លាំងអន្តរាគមន៍កងប្រតិបត្តិការរុករក និងសង្គ្រោះគ្រោះមហន្តរាយ (៧១១) នៃកងពលតូចលេខ៧០ ក៏បានទៅដល់ក្រុងប៉ោយប៉ែតដោយមានឧទ្ធម្ភាគចក្រ ២គ្រឿងនៅកន្លែងកើតហេតុ។

សូមបញ្ជាក់ថា អគ្គិភ័យនេះ បានកើតមានតាំងពីវេលាម៉ោង ១១៖៤០នាទីយប់ថ្ងៃទី២៨ ខែធ្នូ ឆ្នាំ២០២២ ដោយសមត្ថកិច្ចមិនទាន់បញ្ជាក់ពីមូលហេតុនៃការឆាបឆេះនៅឡើយទេ៕