ជនរងគ្រោះក្នុងហេតុការណ៍គ្រោះអគ្គិភ័យឆេះហាងយីហោ កន្លែងថ្មី នៅសង្កាត់ផ្សារដេប៉ូទី២ ខណ្ឌទួលគោក កាលពីម្សិលមិញ បានស្លាប់បាត់បង់ជីវិតហើយនៅវេលាម៉ោង៥និង៤៥នាទីព្រឹកថ្ងៃទី១ ខែកុម្ភៈ ឆ្នាំ២០២៣នេះ សពជនរងគ្រោះត្រូវបានបញ្ជូនយកទៅសម្កល់នៅវត្តទឹកថ្លា។

ជនរងគ្រោះមានឈ្មោះ សេង សំអាង ភេទប្រុស អាយុ២៩ឆ្នាំ មានស្រុកកំណើតនៅភូមិកោះកាពិក ឃុំកោះកាពិក ស្រុកកោះកុង ខេត្តកោះកុង។

សូមបញ្ជាក់ថា កាលពីវេលាម៉ោង១០និង៤៥នាទី ព្រឹកថ្ងៃទី៣១ ខែមករា ឆ្នាំ២០២៣ មានករណីអគ្គិភ័យឆាបឆេះនៅចំណុចហាងកន្លែងថី្ម ផ្លូវ១៣៨ ក្រុម៤១ ភូមិ២ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ បណ្ដាលឲ្យមានមនុស្សប្រុសស្រី២នាក់ស្លាប់នៅកន្លែងកើតហេតុ និងរងរបួសម្នាក់បញ្ជូនទៅសង្គ្រោះនៅមន្ទីរពេទ្យ។

យោងតាមរបាយការណ៍របស់សមត្ថកិច្ចបានឲ្យដឹងថា ទីតាំងដែលត្រូវអគ្គិភ័យឆាបឆេះនេះ គឺជាភោជនីយដ្ឋានឈ្មោះ «កន្លែងថី្ម» ធ្វើអំពីថ្មបេតុង ប្រក់សង្ក័សី ទំហំ ២០ម៉ែត្រ X ១៩ម៉ែត្រ មានម្ចាស់ឈ្មោះ ហុក ទ្រី ភេទប្រុស អាយុ៣១ឆាំ្ន សញ្ជាតិខែ្មរ ដែលសមត្ថកិច្ចបញ្ជាក់ថា មូលហេតុ គឺផ្ដើមចេញពីជាងផ្សារដែកបង្កជាអគ្គិភ័យ ។

ក្នុងប្រតិបត្តិការជួយអន្តរាគមន៍ កម្លាំងសមត្ថកិច្ចបានប្រើប្រាស់រថយន្ដពន្លត់អគ្គិភ័យចំនួន០៩គ្រឿង ប្រើប្រាស់ទឹកអស់ចំនួន០៩ឡាន ស្មើរនឹង៣៦ម៉ែត្រគូប។

បើតាមប្រភពមួយចំនួនបានលើកឡើងថា ជនរងគ្រោះនៅក្នុងគ្រោះអគ្គិភ័យនេះ គឺជាបុគ្គលិកបម្រើការនៅក្នុងភោជនីយដ្ឋាននេះតែម្ដង ដោយក្រោយពីចប់ម៉ោងការងារពួកគាត់បានសម្រាកនៅក្នុងបន្ទប់ជាន់ខាងលើ៕