ស្នងការខេត្តព្រៃវែងប្ដេជ្ញាធ្វើឲ្យឯកសណ្ឋាននគរបាលចរាចរណ៍ ក្លាយជាឯកសណ្ឋានដែលប្រជាពលរដ្ឋស្រឡាញ់

លោកឧត្ដមសេនីយ៍ទោ ឈឿន ប៊ុនឆន ស្នងការនៃស្នងការដ្ឋាននគរបាលខេត្តព្រៃវែង បានប្ដេជ្ញាថា នឹងធ្វើឲ្យឯកសណ្ឋាននគរបាលចរាចរណ៍ខេត្តព្រៃវែង ក្លាយជាឯកសណ្ឋានដែលប្រជាពលរដ្ឋស្រឡាញ់ នេះបើតាមការលើកឡើងរបស់លោកស្នងការនៅក្នុងហ្វេសប៊ុកផេកផ្លូវការ នៅព្រឹកថ្ងៃទី១៦ ខែមិថុនានេះ។

លោកឧត្ដមសេនីយ៍ទោ ក៏បានសង្កត់ធ្ងន់ដែរថា ខេត្តព្រៃវែង ក៏មិនមាននគរបាលចរាចរណ៍ផាកពិន័យដោយគ្មានវិក័យប័ត្រដែរ បើមានស្នងការជាអ្នកទទួលខុសត្រូវ។

សូមបញ្ជាក់ថា​ លោកឧត្ដមសេនីយ៍ទោ ​ឈឿន ប៊ុនឆន បន្ទាប់ពីទទួលបានការតែងតាំងជាស្នងការ នៃស្នងការដ្ឋាននគរបាលខេត្តព្រៃវែងកាលពីពេលថ្មីៗកន្លងទៅនេះ គេសង្កេតឃើញថា លោកបានដាក់គោលដៅជាច្រើនដើម្បីការពារសុខសុវត្តិភាពប្រជាពលរដ្ឋ និងសន្តិសុខសណ្ដាប់ធ្នាប់សង្គមដើម្បីផ្ដល់ភាពកក់ក្ដៅដល់ពលរដ្ឋ ហើយទន្ទឹមនឹងនោះ ក៏មានប្រជាពលរដ្ឋនៅក្នុងខេត្តព្រៃវែង ក៏ដូចជាមហាជនមួយចំនួនសាទរ និងលើកទឹកចិត្តលោកស្នងការរូបនេះផងដែរ៕

អត្ថបទ៖ សុខុម