អាវុធហត្ថខេត្តតាកែវបង្ក្រាបបានកញ្ឆាក្រៀម​២​បាវនៅស្រុកគីរីវង់

ជាថ្មីទៀតហេីយនៅស្រុកគីរីវង់ ដែលកញ្ឆាក្រៀមជាង១០គីឡូក្រាមត្រូវបានកម្លាំងកងរាជអាវុធហត្ថខេត្តតាកែវរកឃេីញនិងឃាត់ខ្លួនជនសង្ស័យជាស្ត្រីវ័យជាង៥០ឆ្នាំម្នាក់។

ករណីបង្ក្រាបកញ្ឆាក្រៀមនេះ ធ្វេីឡេីងនៅម៉ោង១២និង៣០នាទី ថ្ងៃទី១៥ ខែមិថុនា ឆ្នាំ២០២៣ ដោយកម្លាំងមន្ទីរស្រាវ​ជ្រាវនិងបង្ក្រាបបទល្មើសគ្រឿងញៀន ដឹកនាំដោយលោកវរសេនិយ៍ឯក ង៉ែត ចាន់ធី មេបញ្ជាការរងទទួលជំនាញ តាមបទបញ្ជាពីលោកឧត្តមសេនីយ៍ត្រី សេង មហា មេបញ្ជាការ និងសម្របសម្រួលនីតិវិធីដោយលោក ញ៉ាន បូរី ព្រះរាជអាជ្ញារង អមសាលាដំបូងខេត្តតាកែវ នៅចំណុចរោងបាយខាងក្រោយផ្ទះនៅភូមិចំបក់ ឃុំគោកព្រិច ស្រុកគីរីវង់ ខេត្តតាកែវ ។

ក្នុងនោះបានឃាត់ខ្លួនជនសង្ស័យឈ្មោះ យ៉ាន ស្រ៊ន ភេទស្រី អាយុ៥៧ ឆ្នាំ ជនជាតិខ្មែរមុខរបរកសិករ រស់នៅភូមិចំបក់ ឃុំគោកព្រិច ស្រុកគីរីវង់ ខេត្តតាកែវ ។ វត្ថុតាងដកហូតបានរួមមាន៖ កញ្ឆាក្រៀមចំនួន០២បាវ ទម្ងន់=១៤​គីឡូ​២ខាំ(ដប់បួនគឺឡូពីរខាំ ថ្លឹងទាំងសំបក់បាវ )។ ជញ្ជីងថ្លឹងកញ្ឆាចំនួន០១ និងទូរស័ព្ទដៃ០១គ្រឿងផងដែរ។

បច្ចុប្បន្នជនសង្ស័យរួមទាំងវត្ថុតាងត្រូវបានឃាត់ខ្លួន និងរក្សាទុកនៅទីបញ្ជាការដ្ឋានកងរាជអាវុធហត្ថតាកែវដេីម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី៕

អត្ថបទ៖ វីរៈ