អភិបាលខេត្តកំពតស្នើឲ្យសមត្ថកិច្ចចាត់វិធានការ​ផ្លូវច្បាប់ចំពោះជនអនាមិកដែលបង្កើត​ហ្វេកប៊ុក និងហ្វេកប៊ុកផេកដាក់ឈ្មោះលោក

លោក ម៉ៅ ធនិន អភិបាលនៃគណៈអភិបាលខេត្តកំពត បានស្នើឲ្យកម្លាំងសមត្ថកិច្ចជំនាញនៃអគ្គស្នងការដ្ឋាននគរបាលជាតិ និងស្នងការដ្ឋាននគរបាលខេត្តកំពត ចាត់វិធានការតាមផ្លូវច្បាប់ចំពោះជនអនាមិកដែលបង្កើតអាខោនហ្វេកប៊ុក និងហ្វេកប៊ុកផេកដាក់ឈ្មោះលោកដែលបង្កឲ្យមានការភាន់ច្រឡំ។

លោកអភិបាលខេត្តបញ្ជាក់នៅរសៀលថ្ងៃទី១៨ ខែកក្កដា នេះថា មានជនអនាមិកបានបង្កើតអាខោនហ្វេកប៊ុក និងហ្វេក​ប៊ុកផេក ដោយដាក់ឈ្មោះលោក ក្នុងគោលបំណងបង្កើតព័ត៌មានក្លែងក្លាយ បង្កអោយមានការភាន់ច្រឡំពីសាធារណៈ​ជន។

លោកអភិបាលខេត្តបញ្ជាក់ថា លោកមានអាខោនហ្វេកប៊ុក និងហ្វេកប៊ុកផេកផ្លូវការ ដូចមានចែងក្នុងសេចក្តីប្រកាសព័ត៍មានរបស់រដ្ឋបាលខេត្តកំពត ចុះថ្ងៃទី១ ខែធ្នូ ឆ្នាំ២០២១។ ទន្ទឹមនេះ លោកក៏សូមអំពាវនាវដល់ជំនាញមានសមត្ថកិច្ចនៃអគ្គស្នងការដ្ឋាននគរបាលជាតិ និងស្នងការដ្ឋាននគរបាលខេត្តកំពត ចាត់វិធានការលើជនដែលបង្កើតអាខោនហ្វេសប៊ុកក្លែងក្លាយនេះតាមផ្លូវច្បាប់៕

អត្ថបទ៖ សុខុម