សន្តិសុខសង្គម

ផ្ដន្ទាទោសបុរសម្នាក់ ដាក់ពន្ធនាគារ ១០ ឆ្នាំ ពីបទ«ប៉ុនប៉ងឃាតកម្ម»

បានផុស

៣ years មុន

នៅ

ថ្ងៃពុធ ៦ កញ្ញា ២០២៣

ដោយ

អតីតបុគ្គលិកក្រុមហ៊ុនឯកជនម្នាក់ ត្រូវបានចៅក្រមសាលាដំបូងរាជធានីភ្នំពេញ ប្រកាសសាលក្រមសម្រេចផ្ដន្ទាទោសដាក់ពន្ធនាគារកំណត់ ១០ ឆ្នាំ ក្រោមការចោទប្រកាន់ពីបទ «ប៉ុនប៉ងឃាតកម្ម» យកដែកស្រួចចាក់បុរសម្នាក់ បណ្ដាលឲ្យមានរបួសធ្ងន់ធ្ងរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនជាប់ចោទដែលតុលាការផ្ដន្ទាទោសនេះ ឈ្មោះ សេន អាត ភេទប្រុស អាយុ ៥៦ ឆ្នាំ រស់នៅចំណុចផ្លូវ ៣៧១ សង្កាត់បឹងទំពន់ទី ២ ខណ្ឌមានជ័យ រាជធានីភ្នំពេញ។

រឿងក្ដីប៉ុនប៉ងឃាតកម្មនេះ ត្រូវបាន លោកស្រីចៅក្រម គឹម សុគន្ធា និងលោក ស៊ន មុនី ជាតំណាងអយ្យការ លើកយកបើកសវនាការ កាលពីថ្ងៃទី ២២ ខែសីហា ឆ្នាំ ២០២៣ កន្លងទៅ និងសម្រេចប្រកាសសាលក្រម នាថ្ងៃទី ០៦ ខែកញ្ញា ឆ្នាំ ២០២៣ នេះ។

នៅក្នុងសវនាការ ជនជាប់ចោទ បានសារភាពថា ខ្លួនពិតជាបានយកដែកស្រួចចាក់ទៅលើជនរងគ្រោះមែន។ ពេលនោះ ដោយសារជនរងគ្រោះមកលួចយកអីវ៉ាន់ពីកន្លែងខ្លួនយាមច្រើនដងមកហើយ លុះដល់ថ្ងៃកើតហេតុ ខ្លួនទាន់កំពុងលួចទៀត ក៏មានការប្រតាយប្រតប់គ្នា ហើយខ្លួនក៏ចាក់ជននោះមួយដែកស្រួច បណ្ដាលឲ្យមានរបួសទៅ នៅចំណុចការ៉ាស់សាំង PTT ផ្លូវ ៣៧១ ភូមិត្នោតជ្រុំ ៤ សង្កាត់បឹងទំពន់ទី ២ ខណ្ឌមានជ័យ រាជធានីភ្នំពេញ កាលពីវេលាម៉ោង ១៩ និង ០០ នាទី ថ្ងៃទី ២៧ ខែមីនា ឆ្នាំ ២០២៣។

ជនរងគ្រោះឈ្មោះ យាន ឡាយ ភេទប្រុស អាយុ ៣៤ ឆ្នាំ ជនជាតិខ្មែរ ស្នាក់នៅផ្ទះជួល ផ្លូវ ៧០៥ ភូមិត្នោតជ្រុំ ៤ សង្កាត់បឹងទំពន់ទី ២ ខណ្ឌមានជ័យ រាជធានីភ្នំពេញ មុខរបររើសអេតចាយ។ ក្រោយកើតហេតុ ក៏ត្រូវប៉ូលិសចាប់ខ្លួនបញ្ជូនឡើងតុលាការឃុំខ្លួនដល់បច្ចុប្បន្ន៕

អត្ថបទ ៖ មករា