សមត្ថកិច្ចក្រុងសេរីសោភ័ណបង្ក្រាបក្រុមក្មេងទំនើងដើរលេងយប់ជាង៤០នាក់

កម្លាំងនគរបាលក្រុងសេរីសោភ័ណ សហការណ៍ជាមួយកម្លាំងអាវុធហត្ថក្រុង បើកប្រតិបត្តិការចុះបង្ក្រាបក្រុមក្មេងទំនើងដើរលេងយប់បង្កភាពអាណាធិបតេយ្យបានចំនួន៤២នាក់ និងដកហូតម៉ូតូចំនួន២៣គ្រឿង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រតិបត្តិការនេះបានធ្វើឡើងកាលពីម៉ោង១១និង០០នាទីយប់ ថ្ងៃទី១០ រហូតដល់ម៉ោង៤ទាបភ្លឺ ថ្ងៃទី១១ ខែកញ្ញា នៅក្នុងភូមិសាស្ដ្រក្រុងសេរីសោភ័ណ ខេត្តបន្ទាយមានជ័យ។ យោងតាមរបាយការណ៍របស់ស្នងការដ្ឋាននគរបាលខេត្តបន្ទាយមានជ័យ ក្រុមក្មេងទំនើងដែលឃាត់បានសរុប៤២នាក់ ក្នុងនោះមានស្រី១២នាក់ និងម៉ូតូ២៣គ្រឿង។ របាយការណ៍បញ្ជាក់ថា ក្នុងចំណោមក្មេងទាំង៤២នាក់ មានក្មេងពាក់ព័ន្ធបទល្មើសចំនួន០៦នាក់ដូចជា បទល្មើសគ្រឿងញៀន​៤នាក់​(ស្រី០១នាក់) និងបទល្មើសកែច្នៃបំពង់ស៊ីម៉ាំងម៉ូតូ។

សមត្ថកិច្ចបញ្ចាក់ថា ចំពោះក្មេងទំនើងដែលពិនិត្យមិនមានការពាក់ព័ន្ធនឹងបទល្មើសចំនួន៣៦នាក់ ស្រី១១នាក់ ត្រូវបានអប់រំអោយទៅផ្ទះវិញ និងក្មេងកែច្នៃបំពង់ស៊ីម៉ាំងម៉ូតូចំនួន០២នាក់ ស្រី០១នាក់ បានអប់រំណែនាំអោយធ្វើការដោះដូរសំពងស៊ីម៉ាំងដែលមានលក្ខណៈបច្ចេកទេសត្រឹមត្រូវបំពាក់ដោយក្រុមហ៊ុន ទើបប្រគល់ម៉ូតូអោយប្រើប្រាស់វិញ។ ចំណែកក្មេងដែលមានការពាក់ព័ន្ធនឹងបទល្មើសគ្រឿងញៀន សមត្ថកិច្ចបានឃាត់ខ្លួននៅអធិការដ្ឋានដើម្បីសួរនាំរកអ្នកពាក់ព័ន្ធបន្ត៕

អត្ថបទ៖ វ៉ាន់ ណាង