ស្រឡាងដឹកខ្សាច់របស់ក្រុមហ៊ុន GREEN POWER ១គ្រឿងត្រូវរលកបោកបក់ក្រឡាប់លិចចូលសមុទ្រ

ស្រឡាងដឹកខ្សាច់មួយគ្រឿងត្រូវខ្យល់កន្ត្រាក់ និងរលកធំៗវាយបណ្តាលឲ្យក្រឡាប់ចាក់ខ្សាច់ចោលលិចចូលក្នុងសមុទ្រ ខណៈកំពុងបើកបរលើផ្ទៃសមុទ្រពេលមានភ្លៀង និងខ្យល់ខ្លាំង។នៅក្នុងហេតុការណ៌នេះមានមនុស្សចំនួន២នាក់ត្រូវបានសមត្ថកិច្ចនគរបាលជើងទឹកចេញអូរប័រទៅសង្គ្រោះបានទាន់ពេលវេលា។

ករណីនេះបានកើតមានឡើងនៅវេលាម៉ោង៨និង១៥នាទី ព្រឹកថ្ងៃទី១៥ ខែកញ្ញា ឆ្នាំ២០២៣ នៅចំនុចនិយាមការលេខ 10°45’70.92″N103°32’22.60″E ខាងលិចកោះដូង ស្ថិតនៅភូមិ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ។

សមត្ថកិច្ចបានឲ្យដឹងថា ស្រឡាងដឹកខ្សាច់១គ្រឿងនេះ ពណ៌ទឹកបុិច លេខសាឡង់ AG-21190 មានទទឹងប្រវែង ១០.៤ម៉ែត្រ បណ្តោយ៥៧ម៉ែត្រ។

ស្រឡាងនេះផ្ទុកខ្សាច់បានចំនួន៦០០ម៉ែត្រគីប ជារបស់ក្រុមហ៊ុនGREEN POWER នៅលើសាឡង់មនុស្សចំនួន២នាក់ ១/ ឈ្មោះឡេ ហ៊ួយថាន់ ភេទប្រុស អាយុ៤៨ឆ្នាំ ស្រុកកំណើត ក្រុងហ្គាំងធី ខេត្តគៀងយ៉ាង ប្រទេសវៀតណាម (ជាតាកុងសាឡង់)។ ២/ឈ្មោះឡេ តាន់ហាយ ភេទប្រុស អាយុ៥១ឆ្នាំ ស្រុកកំណើត ក្រុងហ្គាំងធី ខេត្តគៀងយ៉ាង ប្រទេសវៀតណាម។

សូមបញ្ជាក់ថា នៅយប់ថ្ងៃទី១៤និងនៅថ្ងៃទី១៥ ខែកញ្ញា ឆ្នាំ២០២៣នេះ ស្ថានភាពអាកាសធាតុនៅខេត្តព្រះសីហនុ មេឃមានសភាពអាប់អូរ និងមានភ្លៀងធ្លាក់ខ្លាំងខ្សោយទូរទាំងខេត្តព្រះសីហនុលាយឡំនិងខ្យល់កន្ត្រាក់បក់បោកយ៉ាងខ្លាំងជាពិសេសនៅលើលំម្ហរសមុទ្រ៕ 

អត្ថបទ៖ ស៊ុយ ចាន់ធា