Update៖ ស្គាល់អត្តសញ្ញាណស្ត្រីដែលត្រូវជនមិនស្គាល់មុខអារ ក សម្លាប់ប្លន់យកទ្រព្យសម្បត្តិ

ស្ត្រីដែលត្រូវបានជនមិនស្គាល់មុខចូលអារ ក សម្លាប់ដល់ក្នុងផ្ទះមានឈ្មោះ ឈឹម ស្រីមុំ ភេទស្រី អាយុ៤០ឆ្នាំ មុខរបរលក់ដូរនៅផ្ទះកើតហេតុ ក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ។

ជនរងគ្រោះត្រូវបានជនមិនស្គាល់មុខអារ ក សម្លាប់រួចប្លន់យកទ្រព្យសម្បត្តិគេចខ្លួនបាត់។ ដែលករណីនេះបានបង្កការភ្ញាក់ផ្អើលកាលពីវេលាម៉ោង១១និង២៥នាទីព្រឹកថ្ងៃទី០៥ ខែតុលា ឆ្នាំ២០២៣ នៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ខណៈដែលកូនរបស់ជនរងគ្រោះត្រឡប់មកពីសាលារៀនវិញ។

តាមប្រភពព័ត៌មានពីកន្លែងកេីតហេតុ មុនកើតហេតុ ខណៈដែលកូន២នាក់ទៅរៀន ប្តីទៅលក់ដូរនៅផ្លូវចោមចៅ ហើយជនរងគ្រោះនៅផ្ទះម្នាក់ឯង លុះពេលកូនប្រុសស្រីទាំង២នាក់ វិលមកដល់ផ្ទះ ក៏ប្រទះឃើញម្តាយដេកស្លាប់ក្នុងថ្លុកឈាម។

ទោះបីយ៉ាងណា សមត្ថកិច្ចនៅមិនទាន់បញ្ជាក់ពីបាត់បង់ទ្រព្យសម្បត្តិប៉ន្មាននោះទេ ខណៈកំពុងពិនិត្យកោសល្យវិច័យ ស្រាវជ្រាវតាមចាប់ជនដៃដល់យកមកដាក់ទោសតាមផ្លូវច្បាប់៕

អត្ថបទ៖ សុខា