អ៊ំបង្កើតវាយក្មួយតូចអាយុទើបតែជាងមួយខួប រហូតដល់ស្លាប់យ៉ាងអាណោចអាធ័ម

មានករណីបុរសម្នាក់ត្រូវជាអ៊ំបង្កើត ដោយខឹងនឹងក្មេងដែលជាក្មួយយំមិនបាត់ ក៏បានវាយក្មួយរបស់ខ្លួនដោយមិនក្តីផងនោះ រហូតដល់ស្លាប់ភ្លាមៗនៅនឹងកន្លែង។ អំពើដ៏សាហាវនេះ បានកើតឡើងនៅវេលាម៉ោង៩និង៣០នាទីយប់ កាលពីថ្ងៃទី៦ ខែវិច្ឆិកា ឆ្នាំ២០២៣ នៅចំណុចភូមិទួលខ្ពស់ ឃុំក្រូច ស្រុកព្រៃឈរ ខេត្តកំពង់ចាម។

យោងតាមរបាយការណ៍សមត្ថកិច្ចមូលដ្ឋាន ករណីឃាតកម្មមួយនេះ បានបង្កដោយជនសង្ស័យឈ្មោះ សឿង សុភា ភេទប្រុស អាយុ៣៥ឆ្នាំ ជនជាតិខ្មែរ មុខរបរ មិនពិតប្រាកដ រស់នៅភូមិឃុំកើតហេតុខាងលើ ដោយនៅមុនម៉ោងកើតហេតុ ជនសង្ស័យបានផឹកស្រាថ្នាំម្នាក់ឯងអស់មួយលីត្រ ក្នុងស្ថានភាពស្រវឹងជោគជាំ។ លុះដល់ម៉ោង ៩និង៣០នាទី  ថ្ងៃកើតហេតុខាងលើ កុមាររងគ្រោះឈ្មោះ វីន ម៉េងលាង អាយុទើបតែ១៨ខែ បានយំខ្លាំងមិនបាត់សោះ ធ្វើឱ្យជនសង្ស័យជាអ៊ំបង្កើតរូបនេះ ខឹងសម្បារជាខ្លាំងក៏ស្ទុះទៅទះកំផ្លៀង និងវាយដំលើរូបរាងកាយកុមាររងគ្រោះ ដែលត្រូវជាក្មួយបង្កើតរហូតដល់ស្លាប់ភ្លាមៗ។

ក្រោយពេលកើតហេតុ ក៏មានការភ្ញាក់ផ្អើលដល់អ្នកភូមិ និងបានរាយការណ៍ទៅកម្លាំងសមត្ថកិច្ច ខណៈបច្ចុប្បន្ន ជនសង្ស័យត្រូវបានឃាត់ខ្លួនទុកនៅអធិការដ្ឋាននគរបាលស្រុកព្រៃឈរ ដើម្បីកសាងសំណុំរឿងចាត់ការតាមនីតិវិធីច្បាប់ធរមាន។

គួរបញ្ជាក់ថា ជនសង្ស័យ ជាមុខសញ្ញាដោះលែងពីពន្ធនាគារ ពាក់ព័ន្ធបទល្មើសគ្រឿងញៀន កាលពីថ្ងៃទី៦ ខែវិច្ឆិកា  ឆ្នាំ២០២៣ ចំណែកឯម្តាយជនរងគ្រោះ ឈ្មោះ សឿង ចន្ធូ អាយុ៣៥ឆ្នាំ ជនជាតិ ខ្មែរ មុខរបរមិនពិតប្រាកដ ជាស្ត្រីមេម៉ាយរស់នៅភូមិជាមួយគ្នា ក៏ត្រូវបានកម្លាំងសមត្ថកិច្ចឃាត់ខ្លួនកាលពីថ្ងៃទី៤ ខែវិច្ឆិកា ឆ្នាំ២០២៣ថ្មីៗនេះ ដោយពាក់ព័ន្ធបទល្មើសគ្រឿងញៀន៕

អត្ថបទ និង រូបភាព ៖ ឡេក  ចាន់ពេជ្រ