លួចម៉ូតូបានមួយគ្រឿងជិះទៅលួចមួយកន្លែងទៀតត្រូវសមត្ថកិច្ចឃាត់ខ្លួន

ជនសង្ស័យម្នាក់បានធ្វើសកម្មភាពលួចយកម៉ូតូអ្នកដែលធ្វើការរោងចក្រជាមួយគ្នាបានហើយជិះយកមកទុករួចក៏ត្រឡប់ទៅធ្វើការវិញ ខណៈម្ចាស់ចេញមករកម៉ូតូមិនឃើញក៏សុំប្រធានរោងចក្រឆែកកាមេរ៉ា​ឃើញជនសង្ស័យជិះ​ចេញក៏នាំគ្នា​ឃាត់​ខ្លួនប្រគល់ជូនសមត្ថកិច្ចតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង១១និង៤០នាទី ព្រឹកថ្ងៃទី១៦  ខែធ្នូ  ឆ្នាំ២០២៣ នៅក្នុងរោង​ចក្រមួយកន្លែង ភូមិស្វាយ សង្កាត់ចោមចៅទី៣ ខណ្ឌពោធិ៍សែនជ័យ។

ជនសង្ស័យឈ្មោះ ខន សុខុម  ភេទ ប្រុសអាយុ២៣ឆ្នាំ មុខរបរកម្មកររោងចក្រ ស្នាក់នៅបន្ទប់ជួលភូមិតាសេក សង្កាត់កំបូល ខណ្ឌកំបូល។

ជនរងគ្រោះឈ្មោះ ធាង រុន ភេទប្រុសអាយុ៤២ឆ្នាំ មុខរបរកម្មកររោងចក្រ ស្នាក់នៅភូមិស្វាយ  សង្កាត់ចោមចៅទី៣ ខណ្ឌពោធិ៍សែនជ័យ។ ម៉ូតូដែលជនសង្ស័យលួចនោះម៉ាកហុងដាឌ្រីម  ស៊េរីឆ្នាំ២០២២ ពណ៌ខ្មៅ ពាក់ស្លាកលេខ​ភ្នំពេញ1 FD 1713 ។

តាមប្រភពព័ត៌មានបានឱ្យដឹងថា មុនពេលកើតហេតុជនរងគ្រោះបានជិះម៉ូតូខ្លួនទៅធ្វើការទុកក្នុង​រោងចក្រដូច​សព្វមួយដង បន្ទាប់មករូបគាត់ក៏បានទុកសោម៉ូតូនៅតុម៉ាស៊ីនដេរ ដែលគាត់ធ្វើការ។ លុះមកដល់វេលា​កើតហេតុយកសោបែរជាមិនឃើក៏បានចេញមកមើលម៉ូតូក៏បាត់មិនដឹងទៅណា។

ប្រភពដដែលបានបន្តថា បន្ទាប់មករូបគាត់ក៏សុំប្រធានឆែកមើលកាមេរ៉ាសុវត្តិភាព ឃើញជនសង្ស័យជិះចេញទៅ មួយសន្ទុះក៏ចូលចូលក្នុងរោងចក្រវិញ ដើម្បីមកយកម៉ូតូខ្លួនមួយគ្រឿងទៀតម៉ាកហុងដាឌ្រីម ស៊េរីឆ្នាំ២០២៣ ពណ៌ខ្មៅ ពាក់ស្លាកលេខកំពង់ឆ្នាំ1AN 1444 ទើបឃាត់ខ្លួនតែម្តង។

តាមសម្លើយរបស់ជនសង្ស័យបានសារភាពថា  ខ្លួនពិតជាធ្វើសកម្មភាពលួចយកម៉ូតូជនរងគ្រោះពិតប្រាដកមែន  ហើយម៉ូតូដែលខ្លួនជិះនោះក៏មិនមែនជាម៉ូតូខ្លួនដែរ គឺលួចពីកន្លែងធ្វើការចាស់នៅម្តុំអង្គស្នួល បន្ទាប់មកក៏មកធ្វើការ​នៅកន្លែងកើតហេតុទើបតែបានរយៈពេល៣ថ្ងៃក៏ធ្វើសកម្មភាពលួចម៉ូតូមួយគ្រឿងទៀត តែអស់លាក់ត្រូវម្ចាស់​ចាប់បានតែម្តង។

បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅផ្នែកព្រហ្មទណ្ឌ ដើម្បីចាត់ការតាមនីតិវិធី៕

ដោយ៖ សុខា