ឆេះផ្ទះលក់សម្ភារៈអគ្គិសនី២ល្វែងនៅសៀមរាប បណ្ដាលមកពីឆ្លងចរន្តអគ្គិសនី

កាលពីវេលាម៉ោង០៦:១០នាទីព្រឹក ថ្ងៃទី ៣០ ខែ  ធ្នូ  ឆ្នាំ២០២៣ នៅចំនុចផ្ទះថ្ម០២ល្វែង ស្ថិតក្នុងក្រុមទី៣ ភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប មានករណីឆេះផ្ទះលក់សម្ភារៈអគ្គិសនីយីហោ សៀមរាបឡាយស៍។

បើតាមលោក ដា ចំរើន អធិការក្រុងសៀមរាបបានប្រាប់កម្ពុជាថ្មីដឹងថា ករណីអគ្គីភ័យឆាឆេះផ្ទះលក់គ្រឿងអគ្គិសនី គឺបណ្តាលមកពីឆ្លងចរន្តអគ្គិសនី។ លោកអធិការបានឱ្យដឹងបន្តថា ម្ចាស់ផ្ទះមានឈ្មោះ សាន សុភ័ក្ត្ររស្មី ភេទ ប្រុស អាយុ៣៣ឆ្នាំ ជនជាតិខ្មែរ មុខរបរ លក់ដូរគ្រឿងអគ្គិសនី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អគ្គីភ័យបានលេបត្របាក់ផ្ទះថ្ម០២ល្វែង ចំនួនពីរជាន់ ដោយឆេះអស់ទាំងស្រុង ក្រៅពីនេះទ្រព្យសម្បត្តិ និងសម្ភារៈគ្រឿងអគ្គិសនី ត្រូវរងការខូចខាតមួយចំនួនធំ។ ក្នុងករណីខាងលើនេះ មិនមានការរងរបួស ឬប៉ះពាល់ដល់អាយុជីវិតមនុស្សឡេីយ។ នេះជាការបញ្ជាក់បន្ថែមរបស់លោកអធិការក្រុងសៀមរាប។

ករណីអគ្គីភ័យនេះរលត់ទៅវិញទាំងស្រុងនៅវេលាម៉ោង  ១៤:៤០នាទី ដើម្បីពន្លត់អគ្គីភ័យបានទាំងស្រុង ត្រូវប្រើប្រាស់រថយន្តពន្លត់អគ្គីភ័យចំនួន ១៤ គ្រឿង និងប្រើប្រាស់ទឹកអស់ចំនួន  ៤៥ ឡាន ក្នុងនោះ រថយន្តនាយកដ្ឋានបេតិកភ័ណ្ឌចំនួន  ០១ គ្រឿង,រថយន្តស្នងការដ្ឋាននគរបាលខេត្តចំនួន  ០៦  គ្រឿង,រថយន្តកងរាជអាវុធហត្ថចំនួន  ០១  គ្រឿង,រថយន្តក្រុមហ៊ុនចាក់បេតុង KVI ចំនួន  ០១  គ្រឿង,រថយន្តពន្លត់ ព្រលានយន្តហោះចំនួន  ០១  គ្រឿង,រថយន្តអាជ្ញាធរជាតិអប្សរាចំនួន  ០២ គ្រឿង,រថយន្តបុរីទេសចរណ៍  ចំនួន  ០១  គ្រឿង និងរថយន្តពន្លត់អគ្គិភ័យភូមិបៃតង  ចំនួន០១  គ្រឿង៕

អត្ថបទដោយ៖ គឿន វេត