តុលាការសម្រេចឃុំខ្លួនស្នងការរងខេត្តកំពង់ស្ពឺ ពីបទចុះបញ្ជីរៀបការថ្មី ដោយបញ្ជីចាស់មិនទាន់រលាយ

ចៅក្រមស៊ើបសួរសាលាដំបូងខេត្តកំពង់ស្ពឺ បានចេញដីកាឃុំខ្លួនលោក ឃុត វឌ្ឍនា ស្នងការរងខេត្តកំពង់ស្ពឺ ពីបទទ្វេពន្ធភាព ដែលប្រព្រឹត្តនៅភូមិស្រែថ្នល់ សង្កាត់កណ្តាលដុំ ក្រុងច្បារមន ខេត្តកំពង់ស្ពឺ កាលពីថ្ងៃទី១៨ ខែមករា ឆ្នាំ២០២៤។ នេះបើតាមសេចក្តីប្រកាសថ្ងៃទី១៩ ខែមករា កន្លងទៅ។

បទទ្វេពន្ធភាព មានន័យថា បុរស ឬ ស្ត្រី ដែលមានអាពាហ៍ពិពាហ៍មិនទាន់រលាយ ហើយទៅចុះបញ្ជីអាពាហ៍ពិពាហ៍ថ្មីមួយទៀត។ ទោសនេះ ត្រូវជាប់ពន្ធនាគារពី ៦ខែ ដល់១ឆ្នាំ និងពិន័យជាទឹកប្រាក់។នៅក្នុងសេចក្តីប្រកាសនេះ បានបង្គាប់ឱ្យជនត្រូវចោទខាងលើ ទៅពន្ធនាគារខេត្តកំពង់ស្ពឺ ដោយអនុវត្តតាមច្បាប់ឱ្យបានត្រឹមត្រូវ។

បន្ថែមពីនេះ ប្រធានពន្ធនាគារខេត្តកំពង់ស្ពឺ ត្រូវបង្គាប់ទទួលឃុំខ្លួន លោក ឃុត វឌ្ឍនា រហូតដល់បទបញ្ជាថ្មីសម្រេចបានផ្សេងពីនេះ ហើយគ្រប់ភ្នាក់ងារនៃកងកម្លៃងសាធារណៈទាំងអស់ ត្រូវសហការអនុវត្តនៅពេលដីកានេះត្រូវបានបង្ហាញក្នុងករណីចាំបាច់៕