ខឹងម្ចាស់បំណុលសម្ដីអាក្រក់ ស្ត្រីម្នាក់យកកាំបិតអារកសម្លាប់ម្ចាស់បំណុលរួចគេចខ្លួនចូលប្រទេសថៃ

ស្ត្រីវ័យ៤១ឆ្នាំជាបុគ្គលិកក្រុមហ៊ុនអូរស្មាច់រីសត ត្រូវបានកូនបំណុលយកកាំបិតចុងស្រួចចាក់ កាប់ និងអារកសម្លាប់ ព្រោះតែប្រើពាក្យសម្ដីមិនល្អមកលើកូនបំណុល ខណៈជនដៃដល់ត្រូវបានឃាត់ខ្លួននៅក្នុងទឹកដីប្រទេសថៃក្រោយពីសម្លាប់ជនរងគ្រោះរួច។

ករណីឃាតកម្មនេះបានកើតឡើងកាលពីថ្ងៃទី៤ ខែមីនា ឆ្នាំ២០២៤ វេលាម៉ោងប្រហែល២០និង២០នាទីយប់ នៅចំណុចក្នុងប្រឡាយស្របតាមបណ្ដោយផ្លូវលេខ១ ស្ថិតក្នុងភូមិដើមជ្រៃ សង្កាត់អូរស្មាច់ ក្រុងសំរោង ខេត្តឧត្តរមានជ័យ។

ជនរងគ្រោះមានឈ្មោះ ហឹ សុវណ្ណចរិយា ហៅ អឿន ភេទស្រី អាយុ៤១ឆ្នាំ បច្ចុប្បន្នស្នាក់នៅបន្ទប់ជួលក្នុងបរិវេណផ្សារថ្ម ស្ថិតក្នុងភូមិអូរស្មាច់ សង្កាត់អូរស្មាច់ ក្រុងសំរោង ខេត្តឧត្តរមានជ័យ មុខរបរ ជាបុគ្គលិកក្រុមហ៊ុនអូរស្មាច់រីសត។ ចំណែកជនដៃដល់មានឈ្មោះ ឈឿន កុម្ភ: ភេទស្រី អាយុ២៧ឆ្នាំ មានទីលំនៅភូមិដើមជ្រៃ សង្កាត់អូរស្មាច់ ក្រុងសំរោង ខេត្តឧត្តរមានជ័យ ត្រូវបានឃាត់ខ្លួននៅក្នុងមន្ទីរពេទ្យស្រុកកាប់ឈើង ខេត្តសុរិន្ទ ប្រទេសថៃ និងបាននាំយកមកកាន់ប៉ុស្តិ៍នគរបាលរដ្ឋបាលអូរស្មាច់ ដើម្បីធ្វើការសាកសួរ និងកសាងសំណុំរឿងតាមនីតិវិធី។

តាមរបាយការណ៍សមត្ថកិច្ច ជនដៃដល់បានសារភាពថា រូបខ្លួនពិតជាបានធ្វើសកម្មភាពយកកូនកាំបិតមានចុងស្រួចចាក់ កាប់ និងអារក ជនរងគ្រោះរហូតដល់ស្លាប់ពិតប្រាកដមែន ហើយបន្ទាប់ពីបានធ្វើសកម្មភាពរួច រូបខ្លួនបានប្រមូលយក ទូរសព្ទ និងប្រាក់កាសមួយចំនួន ដែលជារបស់ជនរងគ្រោះគេចខ្លួនទៅសម្រាកនៅក្នុងមន្ទីរពេទ្យស្រុកកាប់ឈើង ប្រទេសថៃ ដោយសាររូបខ្លួនជំពាក់ប្រាក់ជនរគ្រោះ និងស្អប់ជនរងគ្រោះមានសម្ដីអាក្រក់មកលើខ្លួន​។

ជនសង្ស័យ និងវត្ថុតាង ត្រូវ​បានរៀបចំកសាងសំណុំរឿងតាមនីតិវិធីបញ្ជូនទៅកាន់សាលាដំបូងខេត្តចាត់ការបន្តតាមផ្លូវច្បាប់៕

អត្ថបទ៖ សុខុម