ខ្យល់កន្ត្រាក់បានវាយដំបូលផ្ទះពលរដ្ឋជាង ១០០ ខ្នង និងបំផ្លាញកៅស៊ូមួយចំនួនធំ

ភ្លៀងមួយមេធំ លាយឡំដោយខ្យល់កន្ត្រាក់ បានបក់មកពីទិសខាងត្បូងមកលើ ឃុំទន្លង និងឃុំជាំគ្រវៀន ស្រុកមេមត់ ខេត្តត្បូងឃ្មុំ បណ្ដាលឱ្យលំនៅដ្ឋានរបស់ប្រជាពលរដ្ឋ ខូចខាតរបើកដំបូលទាំងតូចទាំងធំជាង ១០០ ខ្នង និងបាក់ដើមកៅស៊ូដែលកំពុងហុចផលជាងមួយម៉ឺនដើម។

សមត្ថកិច្ចមូលដ្ឋាន ប្រាប់ឱ្យដឹងនៅ ថ្ងៃទី៩ ខែមិថុនា នេះថា នៅពេលមេឃខ្មៅងងឹត បន្តិចក្រោយមកស្រាប់តែខ្យល់កន្ត្រាក់បោកជាខ្លាំង ជាហេតុធ្វើឱ្យលំនៅឋានរបស់ប្រជាពលរដ្ឋទាំងតូចធំរងការខូចខាត។

គ្រោះធម្មជាតិនេះបានកើតឡើងកាលពីវេលាម៉ោង ៥ និង ២៥នាទីរសៀល ថ្ងៃទី៧ មិថុនា ឆ្នាំ២០២៤ នៅចំណុចភូមិស្លាភ្នំ និងភូម្កោរ ឃុំទន្លូង មានភ្លៀង ខ្យល់ រន្ទះបណ្តាលអោយខូចខាតចំនួន ១០៤ គ្រួសារ របើកដំបូលផ្ទះចំនួន ៣១ គ្រួសារ បាក់ដើមកៅស៊ូចំនួនជាង ៥០០០ ដើម បាក់ដើមស្វាយចន្ទីរចំនួន ២៤០ ដើម និងជន្លង់ម្រេចមួយចំនួនទៀត។

បន្ទាប់មកលោកឧត្តមសេនីយ៍ត្រី ចិន នី ស្នងការនគរបាលខេត្ត បានឱ្យកម្លាំងប៉ុស្តិ៍រដ្ឋបាលមូលដ្ឋានចុះស្រាវជ្រាវមើលពីផលប៉ះពាល់គ្រោះធម្មជាតិនេះ។ សំណាងល្អមិនមានពលរដ្ឋណាម្នាក់រងគ្រោះថ្នាក់ដល់ជីវិតទេ។ ចំណែកនៅភូមិម្រាន់ និងភូមិជ្រៃឡើង ក្នុងឃុំជាំគ្រវៀន ជាប់ព្រំដែនប្រទេសវៀតណាម ភ្លៀង និងខ្យល់កន្ត្រាក់នេះបានបំផ្លាញដើមកៅស៊ូកំពុងតែហុចផលរាល់ថ្ងៃ ចំនួន ១០ ៣៦៩ ដើម៕​

អត្ថបទ៖ សាន វិឡែម