បង្រ្កាប​បទល្មើសនេសាទលើទីតាំង ៣ កន្លែងផ្សេងគ្នា ប្រើឧបករណ៍ល្មើសយ៉ាងសន្ធឹកសន្ធាប់

បទល្មើសនេសាទក្នុងខេត្តបាត់ដំបងនៅតែកើតមាន ស្របពេលនៅតាមបណ្តាខេត្តគោលដៅដូចគ្នាបានប្រកាសបិទមួយ​រយះ​។ ប្រជាសហគមន៍លើកឡើងដោយដាក់ការសង្ស័យថា អ្នកបង្កើតបទល្មើសទំហំ​ធំហាក់មិនខ្លាចញញើតការប្រព្រឹត្តិឡើយ បើបែកធ្លាយពីប្រជាសហគមន៍ទើបមានការបង្ក្រាប តែបង្ក្រាបហើយរំលង ២ ទៅ ៣ ថ្ងៃ ក្រុមដដែលនៅ​តែបន្តប្រព្រឹត្តដដែល ទំនងមានភ្លើងខៀវពីមន្ត្រីណាម្នាក់ជួយបិទបាំងដើម្បីផលប្រយោជន៍ ទើបជនប្រព្រឹត្តមិនញញើតក្នុងការប្រព្រឹត្តម្តងហើយម្តងទៀត។

ពលរដ្ឋ​បន្តថា “កាប់បំផ្លាញឧបករណ៍ម្តងៗមានអីខាត។ បើមុនបែកធ្លាយហើយបង្ក្រាប មិនដឹងថាដាក់យកត្រីបានប៉ុន្មាន​ដង​ទៅហើយនោះទេ។ អីចឹងហើយកាប់ចោលប៉ុណ្នឹងមានអីចម្លែក បើជនល្មើស​មិនខាតផងហ្នឹង បើសម្រាប់ប្រជានេសាទតូចតាចវិញ ដឹងតែខាតស្ទើររកលុយសងគេមិនបានផង។

ជុំវិញការលើកឡើងពីប្រជាសហគមន៍នេះ លោក ជួង សុភា ធ្លាប់ប្រាប់កម្ពុជាថ្មីថា មន្ត្រីលោក​មាន​គ្នា​តិច ហើយអ្នកប្រព្រឹត្តបទល្មើស តែងប្រព្រឹត្តនៅទីតាំងឆ្ងាយ ដែលមន្ត្រីលោក​ពិបាកក្នុង​ការចុះទៅដល់ទីតាំង។

នៅថ្ងៃទី ៨ ខែមិថុនា សមត្ថកិច្ច​ចម្រុះ​បានចុះទៅ​បង្រ្កាបបទល្មើស​នេសាទ​យ៉ាងហោចណាស់ក៏ ៣ ទីតាំងផ្សេងគ្នា ដោយ​​​ប្រើប្រាស់កាណូតស្មាច់ចំនួន ៥ គ្រឿង ជាមធ្យោបាយចុះបង្ក្រាបនៅ​លំហ​ទន្លេសាប ចំណុច អាស្បៃវែង កោះដាច់ ពាមកោះក្អែក ក្នុងឃុំកោះជីវាំង ស្រុក​ឯកភ្នំ ខេត្ដ​បាត់ដំបង។

ក្នុងនោះទីតាំងទី​ ១ នៅចំណុច អាស្បៃវែង (ទន្លេសាប) ជាលទ្ធផលបង្រ្កាបបានរបាំងសាច់អួនប្រវែង ១៥០០​ម៉ែត្រ, បង្គោលចំនួន ៤០០ ដើម, ឡុកចាប់ត្រីចំនួន ៥ គ្រឿង។ ទីតាំងទី២ នៅចំណុច កោះដាច់ (ស្ទឹងសង្កែ) បង្ក្រាបបាន របាំង​សាច់អួន ប្រវែង ៥០០ម៉ែត្រ ,បង្គោលចំនួន ៤០០ដើម ,ឡុកចាប់ត្រី ចំនួន ១០គ្រឿង និង ទីតាំងទី៣ នៅចំណុច ពាមកោះក្អែក (ស្ទឹងសង្កែ) បង្ក្រាប​បាន​របាំងស្បៃមុងប្រវែង ៦០០ម៉ែត្រ, បង្គោលចំនួន ៥០០ ដើម, លូស្បៃមុង ចំនួន ១០ មាត់។

មន្ត្រីដដែលថា វត្ថុតាងបទល្មើសក្រោយការបង្ក្រាប សមត្ថកិច្ចនិងមន្ត្រីជំនាញសម្រេច​កាប់​កម្ទេច​ចោល​នៅនឹងកន្លែងប្រព្រឹត្តបទល្មើសតែម្តង៕

អត្ថបទ៖ សៅ សារិទ្ធ