សមត្ថកិច្ចប្រកាសរកសាច់ញាតិបុរសម្នាក់ដែលគេប្រទះឃើញក្បែរទីលានចាក់សំរាម មានដែកគោលជាប់ក្បាល

បុរសមិនស្គាល់អត្តសញ្ញាណម្នាក់ត្រូវបានគេប្រទះឃើញនៅក្បែរទីលានចាក់សំរាម ក្នុងភូមិសាស្ត្រឃុំសង្កែ១ ស្រុកឆែប ខេត្តព្រះវិហារ ដែលមានដែកគោល១ដើមជាប់ក្បាល ហើយនិយាយមិនរួចដើរក៏មិនកើត ត្រូវសមត្ថកិច្ចខេត្តព្រះវិហារ បញ្ជូនទៅព្យាបាលនៅមន្ទីរពេទ្យមិត្តភាពខ្មែរ-សូវៀត និងប្រកាសស្វែងរកសាច់ញាតិ។

សមត្ថកិច្ចបានឲ្យដឹងថា បុរសដែលពុំស្គាល់អត្តសញ្ញាណនោះមានភិនភាគដូចក្នុងរូបថតខាងក្រោម ដែលកម្លាំងនគរបាលប៉ុស្តិ៍ឃុំសង្កែ១ ស្រុកឆែប ខេត្តព្រះវិហារ ប្រទះឃើញដេកនៅក្បែរទីលានចាក់សំរាម ដោយនិយាយមិនចេញ ដើរមិនរួច ព្រមទាំងមិនស្គាល់អត្តសញ្ញាណ។ ចំពោះករណីនេះសមត្ថកិច្ចសន្និដ្ឋានថា បុរសខាងលើអាចមានទីលំនៅ នៅស្រុកតាំងគោក ខេត្តកំពង់ធំ។

សមត្ថកិច្ចបានបន្តថា នៅថ្ងៃទី១៦ ខែកក្កដាឆ្នាំ២០២៤នេះ បុរសរូបនេះត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យខេត្ត និងបញ្ជូនបន្តទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ ។ ករណីក្រុមគ្រួសារសាច់ញាតិ និងសាធារណជន បានស្គាល់បុរសខាងលើនេះ សូមធ្វើការទំនាក់ទំនងមកកាន់លេខទូរស័ព្ទ ០៩៧ ៥០៤ ៦៥០៤ ឬស្នងការរងនគរបាលខេត្តព្រះវិហារលេខ ០៩៥ ៩៩៨ ៩៥៣ មន្ត្រីប្រចាំមន្ទីរពេទ្យមិត្តភាពខ្មែរ-សូវៀត ដើម្បីទទួលបានព័ត៌មានអំពីបុរសខាងលើ៕

ដោយ៖ជុន កុសល