រដ្ឋបាលខណ្ឌប្ញស្សីកែវ ដាក់ផែនការពង្រឹងការងារសន្តិសុខដើម្បីបម្រេីប្រជាពលរដ្ឋក្នុងមូលដ្ឋាន

លោក ជិន ប៊ុនធឿន អភិបាលខណ្ឌឫស្សីកែវ កាលពីសៀលថ្ងៃពុធ ទី១៤សីហា បានដឹកនាំកិច្ចប្រជុំគណៈបញ្ជាការឯកភាពរដ្ឋបាលខណ្ឌ ដេីម្បីពង្រឹងការងារសន្តិសុខ និងពង្រឹងស្មារតីមន្ត្រីរាជការ កងកម្លាំងប្រដាប់អាវុធត្រូវខិតខំបម្រេីប្រជាជន ជំរុញការអភិវឌ្ឍន៍នៅមូលដ្ឋានអោយកាន់តែខ្លាំងខ្លាទ្វេឡេីងថែមទៀត។

ជាមួយគ្នានេះ លោកអភិបាលខណ្ឌ គណៈអភិបាលខណ្ឌ និងមន្ដ្រីរាជការនៃរដ្ឋបាលខណ្ឌឫស្សីកែវ ក៏បានប្រកាសគាំទ្រប្រសាសន៍របស់សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា និងជាប្រធានគណបក្សប្រជាជនកម្ពុជា តាមរយៈការសារសំឡេងពិសេស ពន្យល់បន្ថែមអំពីកិច្ចសហប្រតិបត្តិការ តំបន់ត្រីកោណអភិវឌ្ឍ កម្ពុជា-ឡាវ-វៀតណាម កាលពីរសៀលថ្ងៃទី១២ ខែសីហា ឆ្នាំ២០២៤ ដោយប្រឆាំងដាច់ខាត ចំពោះក្រុមជ្រុលនិយម ដែលប៉ុនប៉ងផ្តួលរំលំរាជរដ្ឋាភិបាលស្របច្បាប់ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។

លោកអភិបាលបានគូសបញ្ជាក់យ៉ាងច្បាស់ថា ការធ្វើបដិវត្តន៍ពណ៌គឺជាមេរោគដ៏គ្រោះថ្នាក់បំផុត ក្នុងសតវត្សទី២១ ដែលចាំបាច់ត្រូវកម្ចាត់ចោល។ កម្ពុជានៅពេលនេះកំពុងទទួលការគំរាមកំហែងដល់សន្តិសុខជាតិពីក្រុមជ្រុលនិយមប្រឆាំងរាជរដ្ឋាភិបាលដែលដឹកនាំដោយគណបក្សប្រជាជនកម្ពុជា។

ដូច្នេះហើយ ដេីម្បីធានាបានសន្តិសុខជាតិល្អប្រសេី ប្រជាជនរស់នៅដោយសុខសាន្ត គ្មានការភ័យព្រួយ រាជរដ្ឋាភិបាលស្របច្បាប់កម្ពុជា រួមទាំងអាជ្ញាធរ ចាំបាច់ណាស់ត្រួវតែចាត់វិធានការអោយបានតឹងរ៉ឹងបំផុត ដើម្បីទប់ទល់នឹងចេតនាអាក្រក់នេះ និងធានាឱ្យបាននូវការរក្សាសន្តិភាព ស្ថិរភាព សណ្តាប់ធ្នាប់សាធារណៈ ពិសេសចេតនាបំផ្លាញកម្ពុជា អោយធ្លាក់ចូលទៅក្នុងស្ថានភាពវឹកវរ និងសង្គ្រាម៕

អត្ថបទ៖ សុភា