នគរបាលក្រុងតាខ្មៅ ឃាត់ខ្លួនក្រុមជនសង្ស័យជាប្តីប្រពន្ធ ៤នាក់ ពាក់ព័ន្ធករណីលួចយ៉ាងសកម្ម

ដោយអនុវត្តតាមបទបញ្ជារបស់លោកឧត្តមសេនីយ៍ទោ ឈឿន សុចិត្ត ស្នងការនៃស្នងការដ្ឋាននគរបាលខេត្តកណ្តាល កម្លាំងជំនាញនគរបាល ក្រុងតាខ្មៅ ដឹកនាំដោយលោកវរសេនីយ៍ឯក យី វណ្ណដា អធិការនគរបាលក្រុងតាខ្មៅ បើកការស្រាវជ្រាវឈានដល់បង្ក្រាបឃាត់ខ្លួនជនសង្ស័យប្តីប្រពន្ធ៤នាក់ ពាក់ព័ន្ធនឹងករណីអំពើលួច ចំនួន០៧ករណី។

សមត្ថកិច្ចបាន អោយដឹងថា ក្រោយទទួលបានបទបញ្ជា ពីលោកស្នងការ និងទទួលបានពាក្យបណ្តឹងរបស់ជនរងគ្រោះ កម្លាំងជំនាញ នៃអធិការដ្ឋាននគរបាលក្រុងតាខ្មៅបានស្រាវជ្រាវតាមជំនាញ រហូតដល់រសៀលថ្ងៃទី១៥ ខែសីហា ឆ្នាំ២០២៤ កម្លាំងផ្នែកព្រហ្មទណ្ឌ ដឹកនាំដោយលោកវរសេនីយ៍ទោ ហេង សុផាណារិទ្ធ អធិការរងផ្នែកព្រហ្មទណ្ឌ និងកម្លាំងប៉ុស្តិ៍នគរបាលរដ្ឋបាលពាក់ព័ន្ធ បានឃាត់ខ្លួនជនសង្ស័យប្រុសស្រី៤នាក់ ពាក់ព័ន្ធនឹងករណីអំពើលួច ចំនួន០៧ករណី នៅសង្កាត់កំពង់សំណាញ់០៤ករណី សង្កាត់តាខ្មៅ០៣ករណី ម៉ូតូ០២គ្រឿង កង់១គ្រឿង ក្រុងតាខ្មៅ ខេត្តកណ្តាល។

ជនសង្ស័យ និងវត្ថុតាងត្រូវបានសមត្ថកិច្ចជំនាញ កំពុងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី៕

អត្ថបទ៖ សំណាង