ការបង្រ្កាបបទល្មើសនេសាទ ក្នុងដែនទន្លេសាប ខេត្តបាត់ដំបង កើនឡើង ១៦ ករណី

លោក ជួង សុភា នាយខណ្ឌរដ្ឋបាលជលផល ខេត្តបាត់ដំបង បានឱ្យដឹងថា គិតត្រឹមខែសីហា ក្នុងឆ្នាំ២០២៤ នេះ ខណ្ឌរដ្ឋបាលជលផល បានបង្រ្កាបករណីបទល្មើសនេសាទក្នុងដែនទន្លេសាប ក្នុងខេត្តបាត់ដំបង និងបំផ្លាញវត្ថុតាងចោលចំនួន ១៦៥ ករណី កើន ១៦ ករណី បើធៀបរយៈពេលដូចគ្នា ក្នុងឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងចំណោមការបង្រ្កាបខាងលើ មានករណីពិន័យអន្តរការណ៍ចំនួន ២៩ ករណី, បញ្ចូនទៅតុលាការ ចំនួន ១៤ ករណី រួមនឹងឧបករណ៍ និងសម្ភារពាក់ព័ន្ធបទល្មើសជាច្រើនផ្សេងទៀតផងដែរ។

លោក ជួង សុភា បានបញ្ជាក់ថា ករណីបង្ក្រាបបទល្មើសជលផល ចុងក្រោយបានធ្វើឡើង កាលពីថ្ងៃទី០៥ ខែកញ្ញា ឆ្នាំ២០២៤ នៅចំណុចស្ទឹងកី កំប្រាងធំ បឹងអាស្មែត ជំទាវម៉ៅ ខាងត្បូង បាតទន្លេសូត្រ និងបាតទន្លេសូត្រ ស្ថិតក្នុង ឃុំកំពង់ព្រៀង  ស្រុកសង្កែ ខេត្តបាត់ដំបង បង្ក្រាបបាន ៦ ករណី។ ក្នុងនោះ កម្លាំងចុះបង្ក្រាបសរុប ១៩ នាក់ រួមមាន កម្លាំងគណៈបញ្ជាការកងឯកភាពរដ្ឋបាលស្រុក ជលផល និងសហគមន៍នេសាទ ជាមួយមធ្យោបាយ កាណូត ៥ គ្រឿង។

លទ្ធផល នៃការបង្ក្រាប បានកាប់បំផ្លាញចោលដូចជា សាច់មង ២ ៩០០ ម៉ែត្រ, បង្គោល ៩២០ ដើម, ឡុកចាប់ត្រី ១២ គ្រឿង, និងត្រីចម្រុះ ២៤០ គីឡូក្រាម និងត្រូវបានព្រលែងវិញ៕

អត្ថបទ៖ សៅ សារិទ្ធ