សន្តិសុខសង្គម

ចូលទិញអីវ៉ាន់ ភ្លេចដកសោ ចេញមកវិញបាត់ម៉ូតូ ផ្អើលដល់សមត្ថកិច្ចរកឃើញនៅផ្លូវរថភ្លើង

បានផុស

៧ ខែ មុន

នៅ

ថ្ងៃពុធ ១១ កញ្ញា ២០២៤

ដោយ

ស្ត្រីម្នាក់ ជិះម៉ូតូចូលទិញអីវ៉ាន់ ភ្លេចដកសោ ចេញមកវិញក៏បាត់ម៉ូតូ នៅលើផ្លូវវេងស្រេង ផ្អើលឆោឡោដល់សមត្ថកិច្ចជួយមើលតាមប្រព័ន្ធ ជីភីអេស ក៏រកឃើញនៅឯផ្លូវរថភ្លើង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបង្កការភ្ញាក់ផ្អើលកាលពីវេលាម៉ោង ១១ និង ៣០ នាទី ព្រឹកថ្ងៃទី ១១ ខែកញ្ញា ឆ្នាំ ២០២៤ នៅត្រង់ចំណុចផ្ទះលក់អីវ៉ាន់ចាប់ហួយមួយកន្លែង តាមបណ្ដោយផ្លូវវេងស្រេង ស្ថិតក្នុងសង្កាត់ចោមចៅទី ០២ ខណ្ឌពោធិ៍សែនជ័យ រាជធានីភ្នំពេញ។

តាមប្រភពព័ត៌មានពីជនរងគ្រោះបានឲ្យដឹងថា មុនពេលកើតហេតុ គាត់បានជិះម៉ូតូមួយគ្រឿង ម៉ាក ហុងដាប៊ីត ពណ៌ក្រហមលាយស ពាក់ស្លាកលេខ ភ្នំពេញ 1JK-7644 ចេញពីធ្វើការ គោលបំណងទិញអីវ៉ាន់ដើម្បីយកទៅផ្ទះ។ លុះមកដល់ផ្ទះលក់អីវ៉ាន់ចាប់ហួយមួយកន្លែង លើផ្លូវវេងស្រេង សង្កាត់ចោមចៅទី ០២ ក៏បានឈប់ទិញអីវ៉ាន់មួយចំនួន។ ស្របពេលនោះដែរ ស្ត្រីរងគ្រោះ បានចុះពីលើម៉ូតូ ដោយភ្លេចដកសោចេញពីម៉ូតូ រួចដើរទៅទូទាត់ប្រាក់ឲ្យថ្លៃអីវ៉ាន់គេ ក៏ស្រាប់តែមានជនឆ្លៀតឱកាសធ្វើសកម្មភាពឡើងជិះរត់គេចខ្លួនតែម្ដង។ ភ្លាមៗ ស្ត្រីរងគ្រោះ បានរាយការណ៍ជូនសមត្ថកិច្ចជួយរកម៉ូតូតាមប្រព័ន្ធ ជីភីអេស ប្រដេញរហូតមកដល់ផ្លូវរថភ្លើង ក្នុងសង្កាត់ស្រះចក ទើបរកឃើញម៉ូតូវិញនៅខាងក្រោមតង់អនាធិបតេយ្យ។ ចំណែកឯជនសង្ស័យ បានរត់គេចខ្លួនបាត់ស្រមោលតែម្ដង។

ក្រោយកើតហេតុ សមត្ថកិច្ចមូលដ្ឋាន បានមកដល់ និងធ្វើកំណត់ហេតុប្រគល់សំណុំរឿងទៅកាន់សមត្ថកិច្ចប៉ុស្តិ៍ចោមចៅទី ០២ ដែលជាម្ចាស់ករណី ដើម្បីនាំជនរងគ្រោះដាក់ពាក្យបណ្ដឹង ស្រាវជ្រាវរកជនសង្ស័យ ចាត់ការតាមផ្លូវច្បាប់៕

អត្ថបទ ៖ រដ្ឋា