សន្តិសុខសង្គម

ឃាត់ខ្លួនជនសង្ស័យ ០៣ នាក់ ក្រោយធ្វើសកម្មភាពវាយប្លន់យកម៉ូតូបានសម្រេច ចំនួន ០២ ករណី

បានផុស

២ years មុន

នៅ

ថ្ងៃព្រហស្បតិ៍ ២៦ កញ្ញា ២០២៤

ដោយ

អ៊ិន ពិសី

នគរបាលឃាត់ខ្លួនជនសង្ស័យ ០៣ នាក់ ពាក់ព័ន្ធករណីប្លន់យ៉ាងសកម្មចំនួន ០២ ករណី ក្នុងភូមិសាស្ត្រខណ្ឌដង្កោ។

ប្រភពពីសមត្ថកិច្ចបានឲ្យដឹងថា កាលពីវេលាម៉ោង ០៥ ព្រឹក ថ្ងៃទី ២៥ ខែកញ្ញា ឆ្នាំ ២០២៤ កម្លាំងអធិការដ្ឋាននគរបាលខណ្ឌដង្កោ សហការជាមួយកម្លាំងការិយាល័យនគរបាលព្រហ្មទណ្ឌកម្រិតស្រាល និងការិយាល័យនគរបាលព្រហ្មទណ្ឌកម្រិតធ្ងន់, កម្លាំងប៉ុស្តិ៍នគរបាលរដ្ឋបាលចោមចៅ ០១ ខណ្ឌពោធិ៍សែនជ័យ បើកការស្រាវជ្រាវរហូតឈានដល់ការឃាត់ខ្លួនជនសង្ស័យចំនួន ០៣ នាក់ ពាក់ព័ន្ធករណីវាយប្លន់បានសម្រេចចំនួន ០២ ករណី។

គួរបញ្ជាក់ថា កាលពីថ្ងៃទី ២០ ខែកញ្ញា ឆ្នាំ ២០២៤ ករណីទី ០១ នៅចំណុចខាងត្បូងស្តុបបាគូ ផ្លូវ ២១៧ មានជនសង្ស័យ ០៣ នាក់ បានកាន់កាំបិតបុ័ងតោ និងមួកសុវត្ថិភាព វាយប្លន់យកម៉ូតូម៉ាក HONDA DREAM ពណ៌ខ្មៅ ឆ្នាំ ២០២៤ បានសម្រេច។

ករណីទី ០២ កាលពីថ្ងៃទី ២១ ខែកញ្ញា ឆ្នាំ ២០២៤ នៅត្រង់ចំណុចប្រឡាយទឹក ផ្លូវលំ ស្ថិតនៅភូមិទឹកថ្លា សង្កាត់ក្រាំងពង្រ ខណ្ឌដង្កោ ជនសង្ស័យបានយកកាំបិតផ្គាក់គំរាមប្លន់យកម៉ូតូពីជនរងគ្រោះ ម៉ាកហុងដាប៊ីត ពណ៌ស លាយខៀវ បានសម្រេច។

ឃាត់ខ្លួនជនសង្ស័យចំនួន ០៣ នាក់ ៖ ១.ឈ្មោះ គីម គឹមឡេង ភេទប្រុស ជនជាតិខ្មែរ មុខរបរមិនពិតប្រាកដ ទីលំនៅភូមិអំពៅព្រៃ ឃុំកណ្តោក ស្រុកកណ្តាលស្ទឹង ខេត្តកណ្តាល។ ២.ឈ្មោះ តក់ សុវណ្ណ ភេទប្រុស ជនជាតិខ្មែរ មុខរបរមិនពិតប្រាកដ ស្នាក់នៅផ្ទះជួល ភូមិបាគូ សង្កាត់ដង្កោ ខណ្ឌដង្កោ។ ៣.ឈ្មោះ ជាតិ ឧត្តម ហៅ ខ្មៅ ភេទប្រុស ជនជាតិខ្មែរ មុខរបរមិនពិតប្រាកដ ស្នាក់នៅបន្ទប់ជួល ស្ថិតនៅភូមិទួលពង្រ សង្កាត់ចោមចៅ ០១ ខណ្ឌពោធិ៍សែនជ័យ។