ថ្នាក់ដឹកនាំវត្ត និងមន្ត្រីធម្មការខណ្ឌ ចាត់វិធានការលើព្រះសង្ឃមួយអង្គក្រោយបែកធ្លាយវីដេអូអង្គុយសារសងជាមួយនារីម្នាក់

ក្រោយបែកធ្លាយរូបភាពព្រះសង្ឃមួយអង្គគង់នៅវត្ត អរុណវតី សារសងជាមួយនារីម្នាក់បានបង្កអោយមានការភ្ញាក់ផ្អើលយ៉ាងខ្លាំងក្នុងបណ្តាញសង្គម រហូតថ្នាក់ដឹកនាំវត្ត និងមន្ត្រីធម្មការខណ្ឌនិមន្តមកសាកសួរ ទើបដឹងការពិតហើយនិមន្តព្រះសង្ឃខាងលើទៅស្រុកកំណើតវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការអោយដឹងពីថ្នាក់ដឹកនាំវត្ត និងមន្ត្រីធម្មការខណ្ឌខណ្ឌពោធិ៍សែនជ័យ បានអោយដឹងថា ករណីព្រះសង្ឃក្នុងវីដេអូ ដែលបានបែកធ្លាយក្នងបណ្តាញសង្គម ព្រះអង្គជាសាមណេរ មានព្រះនាម ចន សីហា ព្រះជន្ម១៨ឆ្នាំ ជាអតីតសមណសិស្សវត្តជម្ពូវ័ន(ឈប់រៀន) គង់នៅវត្តអរុណវតី សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ។ មានស្រុកកំណើតភូមិចំរើនផល ឃុំតាអុង ស្រុកចំការលើ ខេត្តកំពង់ចាម។

ក្រោយពីបានទទួលព័ត៌មានពីវីដេអូខាងលើ ព្រះគ្រូចៅអធិការវត្ត និងថ្នាក់ដឹកនាំវត្ត និងមន្ត្រីធម្មការខណ្ឌ បាននិមន្តសាមណេរអង្គនោះមកសាកសួរ ក្រោយពីបានសាកសួរលោកក៏បានឆ្លើយសារភាពថា ព្រះអង្គពិតជាបានប្រព្រឹត្តដូចក្នុងវីដេអូ ប្រាកដមែន ហើយសូមទទួលកំហុស និងសូមនិមន្តចេញពីវត្ត អរុណវតី ទៅស្រុកកំណើតវិញ។

តាមពុទ្ធវិន័យសិក្ខាបទទី៣ របស់សាមណេរ តាមរូបភាពនៃវីដេអូ គឺមិនដល់ទោសនាសនង្គៈ (ផ្សឹក)ទេ គឺការពិន័យត្រឹមទណ្ឌកម្មមាន រែកទឹក ពុះអុស និងជម្រះស្មៅជាដើម។

ដោយយោងទៅលើពុទ្ធវិន័យថ្នាក់ដឹកនាំវត្ត និងមន្ត្រីធម្មការខណ្ឌ ក៏អនុញ្ញាតឱ្យសាមណេរខាងលើនិមន្តទៅស្រុកកំណើតវិញ នៅមុនម៉ោង១២និង០០នាទីថ្ងៃត្រង់ ថ្ងៃទី១ ខែធ្នូ ឆ្នាំ២០២៤៕

អត្ថបទ៖ ស្រីរ័ត្ន