មេការ​សំណង់​ជនជាតិ​ចិន​ម្នាក់ ធ្លាក់​ពី​ជាន់​ទី៤២ នៃអគារ ខុនដូ កំពុង​សាងសង់ នៅ​មូលដ្ឋាន​ខណ្ឌបឹងកេងកង

ភ្នំពេញ ៖ បុរសជនជាតិចិន​ជា​មេការសំណង់ម្នាក់ ធ្លាក់ពីការដ្ឋានជាន់ទី៤២ បណ្តាលឱ្យបាត់បង់ជីវិតភ្លាមៗនៅកន្លែងកើតហេតុ ។

ហេតុការណ៍នេះ បានបង្កការភ្ញាក់ផ្អើលនៅវេលាម៉ោង ០៥ នឹង ២០នាទីល្ងាច ថ្ងៃទី ១០ ខែមករា ឆ្នាំ២០២៥ នៅចំណុចខុនដូកំពុងសាងសង់មួយកន្លែង តាមបណ្តោយផ្លូវ ៣០៦ ក្នុងសង្កាត់បឹងកេងកងទី០១ ខណ្ឌបឹងកេង រាជធានីភ្នំពេញ ។

ស.ពឈ្មោះ ZHANG XIAN អាយុ ៦៣ឆ្នាំ ជាជនជាតិចិន មុខរបរ​ជា​មេការ​សំណង់ ស្នាក់នៅផ្ទះលេខ ៥២ ផ្លូវលេខ ២៨២ សង្កាត់បឹងកេងកងទី០១ ខណ្ឌបឹងកេងកង រាជធានីភ្នំពេញ។

ប្រភព​ពី​កម្មករសំណង់បាន​ឱ្យ​ដឹង​ថា មុនកើតហេតុ គាត់បានឃើញបុរសជាមេការខាងលើ បានឡើងពីក្រោមអគារខុនដូកំពុងសាងសង់ខាងលើតាមជណ្តើរយន្ត ដើម្បីត្រួតពិនិត្យការ​សាងសង់​របស់កម្មករ លុះពេលឡើងមកដល់ជាន់ទី៤២ បុរសជាមេការបានដើរចេញពីជណ្តើរយន្តបានបន្តិច ក៏ដើរត្រឡប់ទៅក្រោយវិញ សង្ស័យភ្លេចរបស់របរនៅក្រោម ស្រប​ពេល​នោះ​រអិលជើងធ្លាក់ចុះមកក្រោម បណ្តាល​សាកសព បែកជាបំណែក បង្ក​ឱ្យ​ផ្អើលកម្មករ រួមទាំងពលរដ្ឋនឹងសមត្ថកិច្ច ចុះមកអន្តរាគមន៍ភ្លាមៗ តែម្តង ។

ក្រោយកើតហេតុ សមត្ថកិច្ច​មូលដ្ឋានបានបន្តទាក់ទង​ទៅជំនាញ​កោសល្យវិច័យ​នៃស្នងការដ្ឋាននគរបាលរាជធានីភ្នំពេញ មកត្រួតពិនិត្យសពនៅទីតាំងកើតហេតុ។ បន្ទាប់​ពី​ត្រួតពិនិត្យចប់ សមត្ថកិច្ច​បានធ្វើកំណត់ហេតុប្រគល់​ឱ្យខាងស្ថានទូត ជួយបន្តទាក់ទងរកគ្រួសារសព ដើម្បីយកទៅធ្វើបុណ្យតាមប្រពៃណី ៕

អត្ថបទ ៖ រដ្ឋា