សន្តិសុខសង្គម

បញ្ជូនជនសង្ស័យម្នាក់ បន្លំខ្លួនជាអ្នករើសអេតចាយ សម្ងំឈរចែកចាយគ្រឿងញៀន នៅសួនច្បារក្រុងតាខ្មៅ ទៅតុលាការ

បានផុស

២ ថ្ងៃ មុន

នៅ

ថ្ងៃចន្ទ ២៨ មេសា ២០២៥

ដោយ

បញ្ជូនជនសង្ស័យម្នាក់ ជាមុខសញ្ញាជួញដូរគ្រឿងញៀន បន្លំខ្លួនជាអ្នករើសអេតចាយដែលបានប្រព្រឹត្តិនៅសួនច្បារក្រុងតាខ្មៅ ទៅកាន់តុលាការ នៅថ្ងៃទី ២៨ ខែមេសា ឆ្នាំ ២០២៥ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ២៧ ខែមេសា ឆ្នាំ ២០២៥ ម្សិលមិញ ដោយអនុវត្តតាមបទបញ្ជា លោក គួច ចំរើន អភិបាល នៃគណៈអភិបាលខេត្តកណ្ដាល បានបញ្ជាឲ្យកម្លាំងសមត្ថកិច្ចក្នុងមូលដ្ឋានទាំងអស់យកចិត្តទុកដាក់ល្បាតនៅភូមិសាស្ត្រក្រុងតាខ្មៅ ដើម្បីធានាសុវត្ថិភាពជូនប្រជាពលរដ្ឋក្នុងមូលដ្ឋានចំណុចតាមសួនមាត់ទន្លេតាខ្មៅ ភូមិតាខ្មៅ ១ សង្កាត់តាខ្មៅ ក៏ប្រទះឃើញជនសង្ស័យម្នាក់កំពុងអង្គុយនៅសួនច្បារមាត់ទន្លេ ដោយមានការសង្ស័យកម្លាំងសមត្ថកិច្ចក៏ធ្វើការឃាត់សួរនាំ ហើយឆែកឆេររកឃើញម្សៅក្រាមពណ៌សថ្លាសង្ស័យជាសារធាតុញៀន(ម៉ាទឹកកក) ចំនួន ១ កញ្ចប់ និងសម្ភារៈប្រើប្រាស់មួយចំនួនដែលជនសង្ស័យលាក់ទុកក្នុងកាបូបស្ពាយចំហៀងពណ៌ខ្មៅ។

នៅចំពោះមុខសមត្ថកិច្ច ជនសង្ស័យឈ្មោះ ជួន ម៉ាឡែន ភេទប្រុស បានឆ្លើយសារភាពថា ម្សៅក្រាមពណ៌សថ្លាសង្ស័យជាសារធាតុញៀន(ម៉ាទឹកកក) ចំនួន ១ កញ្ចប់ ពិតជារបស់ខ្លួនប្រាកដមែន ដែលខ្លួនបានទិញពីបុរសម្នាក់មិនស្គាល់ឈ្មោះ អាយុប្រហែល ២៥ ឆ្នាំ សម្បុរស សក់រួញ ស្ថិតនៅគល់ស្ពានភូមិព្រែកតាពៅ ១ សង្កាត់ដើមមៀន ក្រុងតាខ្មៅ ខេត្តកណ្តាល ក្នុងតម្លៃ ១០ ០០០ រៀល (មួយម៉ឺនរៀល) ពិតប្រាកដមែន។