សន្តិសុខសង្គម

ចូលលួចកាត់ខ្សែភ្លើងដាក់លើកង់បី ត្រូវម្ចាស់តាមទាន់បើករថយន្តដេញបុក ឃាត់ខ្លួនបានជនសង្ស័យ ២ នាក់

បានផុស

១ year មុន

នៅ

ថ្ងៃព្រហស្បតិ៍ ៨ ឧសភា ២០២៥

ដោយ

ជនសង្ស័យចំនួន ២ នាក់ ត្រូវបានជនជាតិចិនឃាត់ខ្លួន និងបើករថយន្តដេញបុកក្រឡាប់កង់បី ក្រោយចូលលួចកាត់ខ្សែភ្លើងលើកដាក់លើកង់បីគេចខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៣ និង ១៥ នាទី ទៀបភ្លឺ ថ្ងៃទី ៨ ខែឧសភា ឆ្នាំ ២០២៥ ស្ថិតនៅលើកំណាត់ផ្លូវជាតិលេខ ៦ ទល់មុខក្រុមហ៊ុនលក់រថយន្ត BYD សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

តាមប្រភពព័ត៌មានពីអ្នកបកប្រែឲ្យជនជាតិចិន បានឲ្យដឹងថា កន្លងមកសម្ភារៈប្រើប្រាស់ និងខ្សែភ្លើងមាននៅក្នុងក្រុមហ៊ុនគ្រឿងសំណង់ និងអគ្គិសនី សុង ឆេង តុង ដែលជាទីតាំងកើតហេតុ ត្រូវបានចោរលួចជាញឹកញាប់ ធ្វើឲ្យថៅកែជនជាតិចិនមានការខឹងសម្បាជាខ្លាំង។

ប្រភពបានបន្តថា លុះមកដល់យប់កើតហេតុ ក្រុមជនជាតិចិនខាងលើ បានតាមដានកាមេរ៉ាសុវត្ថិភាពក្នុងក្រុមហ៊ុន ស្រាប់តែឃើញជនសង្ស័យ ២ នាក់ ក្នុងនោះម្នាក់ចូលកាត់ខ្សែភ្លើង និងម្នាក់ទៀតឈរក្បែរកង់បីឥណ្ឌាជាអ្នកចាំមើលផ្លូវ។ ឃើញដូចនេះ ក្រុមជនជាតិចិន បាននាំគ្នាដេញចាប់បានជនសង្ស័យម្នាក់ ដែលជាអ្នកកាត់ខ្សែភ្លើង ចំណែកជនសង្ស័យម្នាក់ទៀត ពេលឃើញគេចាប់គ្នាខ្លួន ក៏បានបើកកង់បីរត់គេច ប៉ុន្តែត្រូវក្រុមបុរសចិនខាងលើបើករថយន្តតូយូតាព្រូស ១ គ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2AZ-6450 ដេញបុកកង់បីឥណ្ឌាពីក្រោយ បណ្តាលឲ្យក្រឡាប់តែម្ដង។

ក្រោយកើតហេតុសមត្ថកិច្ចមូលដ្ឋានបាននាំខ្លួនជនសង្ស័យទាំង ២ នាក់ រួមទាំងភាគីជនជាតិចិនដែលជាម្ចាស់ខ្សែភ្លើងទៅកាន់ប៉ុស្តិ៍នគរបាលរដ្ឋបាលជ្រោយចង្វារ ដើម្បីធ្វើការសាកសួរនាំ និងអនុវត្តបន្តតាមនីតិវិធីច្បាប់៕

អត្ថបទ ៖ សំណាង