សន្តិសុខសង្គម

ឃាត់ខ្លួនមុខសញ្ញាជួញដូរគ្រឿងញៀនម្នាក់ ប្រដាប់ដោយអាវុធ បង្កអសន្តិសុខ ក្នុងមូលដ្ឋានខណ្ឌច្បារអំពៅ

បានផុស

១២ ខែ មុន

នៅ

ថ្ងៃសុក្រ ៩ ឧសភា ២០២៥

ដោយ

កម្លាំងជំនាញការិយាល័យប្រឆាំងគ្រឿងញៀន សហការជាមួយកម្លាំងជំនាញអធិការនគរបាលខណ្ឌច្បារអំពៅ ស្រាវជ្រាវឃាត់ខ្លួនជនសង្ស័យម្នាក់ ដែលជាមុខសញ្ញាជួញដូរគ្រឿងញៀន ប្រដាប់ដោយអាវុធ និងបង្កភាពអសន្តិសុខ ក្នុងមូលដ្ឋានសង្កាត់ច្បារអំពៅទី ២ ខណ្ឌច្បារអំពៅ។

ប្រតិបត្តិការនេះបានធ្វើឡើងកាលពីវេលាម៉ោង ២៣ និង ២០ នាទីយប់ ថ្ងៃទី ៨ ខែឧសភា ឆ្នាំ ២០២៥ ដោយកម្លាំងជំនាញការិយាល័យប្រឆាំងគ្រឿងញៀន បានសហការជាមួយកម្លាំងជំនាញអធិការនគរបាលខណ្ឌច្បារអំពៅ ធ្វើការបង្ក្រាបជាក់ស្ដែងករណីជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀន នៅចំណុចបន្ទប់ជួលគ្មានលេខ ផ្លូវបេតុង ភូមិដើមចាន់ (យឿត្រី) សង្កាត់ច្បារអំពៅ ២ ខណ្ឌច្បារអំពៅ រាជធានីភ្នំពេញ។

នគរបាលបានឲ្យដឹងថា មុនឈានដល់ការឃាត់ខ្លួនជនសង្ស័យឈ្មោះ ប៉េង ដារ៉ា ហៅ អាង៉ោល ភេទប្រុស អាយុ ៣៥ ឆ្នាំនេះ កម្លាំងនគរបាលជំនាញ បានស្រាវជ្រាវស៊ើបអង្កេតកំណត់អត្តសញ្ញាណ ដោយជនសង្ស័យរូបនេះ ជួញដូរ រក្សាទុក និងប្រើប្រាស់ដោយខុសច្បាប់នូវសារធាតុញៀន ប្រដាប់ដោយអាវុធផងដែរ។

ក្នុងរង្វង់ប្រតិបត្តិការកម្លាំងនគរបាលបានដកហូតវត្ថុតាងរួមមាន ៖ ក្រាមពណ៌សថ្លា សង្ស័យជាគ្រឿងញៀន ចំនួន ៧ កញ្ចប់ , គ្រាប់អាវុធខ្លី ៤៥ គ្រាប់ , ដាវដែក ១ , កាំបិត ១ , បំពង់កែវសម្រាប់ប្រើប្រាស់គ្រឿងញៀន ២ , ឧបករណ៍សម្រាប់ប្រើប្រាស់គ្រឿងញៀន ១ និង ទូរស័ព្ទដៃ ២ គ្រឿង។