នគរបាលខេត្តបាត់ដំបង បង្ក្រាបការនាំចូលគ្រឿងក្នុងជ្រូកពីប្រទេសថៃចំនួន១តោនដុតកម្ទេចចោល

កម្លាំងការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបាត់ដំបង កាលពីថ្ងៃទី១៧ ខែឧសភា ឆ្នាំ២០២៥ បានស្ទាក់ចាប់ការនាំចូលគ្រឿងក្នុងជ្រូកគ្មានលិខិតអនុញ្ញាតពីប្រទេសថៃចំនួន១តោន និងយកទៅដុតកម្ទេចចោល។ ការស្ទាក់ចាប់រថយន្ដនាំចូលគ្រឿងក្នុងជ្រូកពីប្រទេសថៃនេះ ធ្វើឡើងនៅលើផ្លូវជាតិលេខ៥ ចំណុចរង្វង់មូលស្រុកថ្មគោល ស្ថិតនៅស្រុកថ្មគោល ខេត្តបាត់វដំបង។

តាមរបាយការណ៍របស់ស្នងការដ្ឋាននគរបាលខេត្ត ការបង្ក្រាបនេះបន្ទាប់ពីពិនិត្យលើដឹកជញ្ជូនខុសលក្ខណៈបច្ចេកទេស និងគ្មានលិខិតអនុញ្ញាត នាំចូលពីប្រទេសថៃ។ ក្នុងប្រតិបត្តិការបង្ក្រាបនេះ សមត្ថកិច្ចបានឃាត់រថយន្តមួយគ្រឿងម៉ាក Toyota Highlander ពណ៌ទឹកមាស ឆ្នាំ២០០៣ ពាក់ផ្លាកលេខ ភ្នំពេញ ២AU -៩៧៦៤ បើកបរដោយឈ្មោះ ញា ចិន្តា ភេទប្រុស អាយុ៤២ឆ្នាំ រស់នៅខេត្តបន្ទាយមានជ័យ រកឃើញគ្រឿងក្នុងជ្រូកចំនួន២០ កេស ក្នុង០១កេស ទម្ងន់ ៥០គីឡូក្រាម សរុបទម្ងន់ស្មើនឹង១,០០០ គីឡូក្រាម និងបាននាំយកមកធ្វើការសាកសួរនៅស្នងការដ្ឋាននគរបាលខេត្តបាត់ដំបង។

ក្រោយការសាកសួរ និងមានការអនុញ្ញាតពីព្រះរាជអាជ្ញារងនៃអយ្យការអមសាលាដំបូងខេត្តដឹកនាំមន្រ្តីជំនាញ រួមមានមន្រ្តី ការិយាល័យផលិតកម្ម មន្ត្រីបសុព្យាបាល មន្ត្រីសាខា (ក.ប.ប) ខេត្តបាត់ដំបង​ និងមន្រ្តីនគរបាល នៅថ្ងៃទី១៨ឧសភា បានយកទៅដុតបំផ្លាញចោលនៅទីលានចាក់សម្រាមស្ថិតនៅភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង រីឯអ្នកដឹកជញ្ជូនសមត្ថកិច្ចនឹងបន្តនីតិវិធីទៅតាមផ្លូវច្បាប់៕