អភិបាលខណ្ឌឬស្សីកែវ ស្នើឲ្យពលរដ្ឋរស់នៅតាមបណ្ដោយផ្លូវជាតិលេខ៥ វេចខ្ចប់សំរាមឲ្យបានត្រឹមត្រូវ

លោក ជិន ប៊ុនធឿន អភិបាលនៃគណៈអភិបាលខណ្ឌឬស្សីកែវ បានស្នើឲ្យប្រជាពលរដ្ឋដែលរស់នៅតាមបណ្ដោយផ្លូវជាតិលេខ៥ ជាពិសេសអ្នករស់នៅតាមប្លុកឌឿងហែម ត្រូវទុកដាក់ និងវេចខ្ចប់សំរាមឲ្យបានត្រឹមត្រូវចៀសវាងដាក់សំរាមនៅលើចិញ្ចើមផ្លូវដែលអាចបង្កឲ្យមានក្លិនស្អុយ ប៉ះពាល់ដល់សោភ័ណភាព និងអនាម័យបរិស្ថាននៅក្នុងមូលដ្ឋាន។លោកបានណែនាំឲ្យពលរដ្ឋត្រូវវេចខ្ចប់ទុកដាក់សំរាមនៅតាមផ្ទះរៀងៗខ្លួន ដើម្បីរង់ចាំរថយន្ដប្រមូលសំរាមមកយកតាមការកំណត់។

ការណែនាំនេះ ធ្វើឡើងនៅពេលលោកដឹកនាំមន្ត្រីនៃរដ្ឋបាលខណ្ឌចុះពិនិត្យ និងរៀបចំសណ្ដាប់ធ្នាប់របៀបរៀបរយ និងអនាម័យបរិស្ថាន តាមបណ្ដោយផ្លូវជាតិលេខ៥ ក្នុងមូលដ្ឋានខណ្ឌឫស្សីកែវ កាលពីព្រឹកថ្ងៃអង្គារ ទី២ កញ្ញានេះ។

លោក ជិន ប៊ុនធឿន ក៏បានណែនាំឲ្យប្រជាពលរដ្ឋត្រូវអនុវត្តតាមវិធានការបរិស្ថានអនាម័យឲ្យបានល្អ ក្នុងគោលបំណងលើកកម្ពស់បរិស្ថានអនាម័យ សណ្ដាប់ធ្នាប់ និងរបៀបរៀបរយឲ្យមានសោភ័ណភាពល្អក្នុងមូលដ្ឋាន។

បន្ទាប់ពីពិនិត្យលើបញ្ហាបរិស្ថាន លោក ជិន ប៊ុនធឿន បានបន្តចុះពិនិត្យស្ថានីយបូមទឹក គីឡូម៉ែត្រលេខ៩ ដែលជាទីតាំងបង្ហូរទឹកចុះទៅបឹងទន្លេសាប។ បើតាមលោក ជិន ប៊ុន​ធឿន ស្ថានីយនេះ មានសមត្ថភាពរំដោះទឹកបានទាន់ពេលវេលា ដើម្បីបញ្ចៀសបញ្ហាជន់លិចដោយជំនន់ទឹកភ្លៀងក្នុងតំបន់ខណ្ឌឫស្សីកែវ៕

អត្ថបទ៖ សំណាង