កីឡា

២០២៥ ជាឆ្នាំប្រវត្តិសាស្ត្រថ្មីសម្រាប់ក្លិបបាល់ទាត់កម្ពុជាលើឆាកអអន្តរជាតិ

បានផុស

៤ ខែ មុន

នៅ

ថ្ងៃព្រហស្បតិ៍ ១ មករា ២០២៦

ដោយ

ក្លិបបាល់ទាត់តំណាងឲ្យកម្ពុជាបានបង្កើតកំណត់ត្រាថ្មីជាច្រើនលើឆាកអន្តរជាតិក្នុងរយៈពេល ១២ ខែនៃឆ្នាំ ២០២៥។

រាប់ចាប់តាំងពីក្លិប ព្រះខ័នរាជស្វាយរៀង ឈានដល់វគ្គផ្តាច់ព្រ័ត្រពានរង្វាន់ទ្វីបអាស៊ី AFC Challenge League។ ការទទួលធ្វើម្ចាស់ផ្ទះវគ្គផ្តាច់ព្រ័ត្រពានរង្វាន់ AFC Challenge League ជាលើកដំបូង កំណត់ត្រាអ្នកចូលទស្សនាផ្ទាល់ច្រើនបំផុត ចំណាត់ថ្នាក់ក្លិបឈានដល់លំដាប់កំពូលទាំង ១០ ប្រចាំតំបន់អាស៊ីខាងកើត ក្លិបកម្ពុជាចំនួនទទួលបានកៅអីទទួលបានកៅប្រកួតពានរង្វាន់អាស៊ីលំដាប់ទី៣ និងពានរង្វាន់អាស៊ីលំដាប់ទី២ថែមទៀត។

១. ធ្វើម្ចាស់ផ្ទះវគ្គផ្តាច់ AFC Challenge Lesgue លើកដំបូង

ក្រុមព្រះខ័នរាជស្វាយរៀង បានឈានដល់វគ្គផ្តាច់ព្រ័ត្រពានរង្វាន់ AFC Challenge League និងទទួលធ្វើម្ចាស់ផ្ទះនៅពហុកីឡដ្ឋានជាតិមរតកតេជោ។ ការប្រកួតវគ្គផ្តាច់ព្រ័ត្រ ព្រះខ័នរាជស្វាយរៀងបានចាញ់ក្រុមរបស់ប្រទេសតួកមេនីស្ថាន FK Arkadag ១-២ ដើម្បីទទួលបានចំណាត់ថ្នាក់លេខ២។

២. អ្នកទស្សនាផ្ទាល់ច្រើនបំផុតកំណត់ត្រាថ្មីវគ្គផ្តាច់ព្រ័ត្រ AFC Challenge League

ការប្រកួតវគ្គផ្តាច់ព្រ័ត្រ រវាង ព្រះខ័នរាជស្វាយរៀង និង FK Arkadag កាលពីថ្ងៃទី១០ ខែឧសភា ឆ្នាំ ២០២៥ មានអ្នកទស្សនាផ្ទាល់ចំនួន ៥១៦១០នាក់ ដែលជាស្ថិតិច្រើនបំផុតមិនធ្លាប់មានក្នុងវគ្គផ្តាច់ព្រ័ត្រពានរង្វាន់ AFC Challenge League គិតចាប់តាំងពីឆ្នាំ ២០០៥។

៣. ចំណាត់ថ្នាក់ក្លិបកម្ពុជាឈានដល់លំដាប់កំពូលទាំង ១០ ប្រចាំអាស៊ីខាងកើត

តាមរយៈលទ្ធផលដ៏ល្អចាប់តាំងពីវគ្គសន្សំពិន្ទុក្នុងពូលរហូតដល់ វគ្គផ្តាច់ព្រ័ត្ររបស់ ព្រះខ័នរាជស្វាយរៀងក្នុងពានរង្វាន់ AFC Challenge League បានផ្តល់ឲ្យក្លិបកម្ពុជាកាន់តែទទួលបានពិន្ទុច្រើនឡើង រហូតដល់ឈានដល់លំដាប់កំពូលទាំង ១០ ប្រចាំតំបន់អាស៊ីខាងកើត។ ឈានចូលដល់ឆ្នាំ ២០២៦ ចំណាត់ថ្នាក់របស់ក្លិបកម្ពុជានៅតែបន្តឈរចំណាត់ទាំង ១០ ដដែល។

៤. ក្លិបកម្ពុជា ២ ប្រកួតពាន AFC Challenge League

ស្របពេល ព្រះខ័នរាជស្វាយរៀង ក្នុងនាមជាជើងឯករងពានរង្វាន់ AFC Challenge League គឺទទួលបានកៅអីវគ្គសន្សំពិន្ទុពូលដោយស្វ័យប្រវត្តិ និងកន្លះកៅអីទៀត នៅរដូវកាល ២០២៥-២៦។ ក្រុមជើងឯករងនៃលីគបាល់ទាត់កំពូលកម្ពុជា ត្រូវប្រកួតជម្រុះដើម្បីទទួលបានកៅអីវគ្គសន្សំពិន្ទុក្នុងពូល ហើយទទួលបានជោគជ័យ។ ដូច្នេះកម្ពុជាមានក្លិបពីរជាលើកដំបូងដែលប្រកួតពានរង្វាន់អាស៊ីគឺ ព្រះខ័នរាជស្វាយរៀង និង ភ្នំពេញក្រោន។

៥. កម្ពុជា ទទួលបានកៅអីពានរង្វាន់ AFC Champions League Two

ការឈានដល់វគ្គផ្តាច់ព្រ័ត្រពានរង្វាន់អាស៊ីកម្រិតទី៣ AFC Challenge League គឺបានផ្តល់ឲ្យកម្ពុជាទទួលបានកៅអីប្រកួតពានរង្វាន់កម្រិតទី២ AFC Champions League Two នៅរដូវកាល ២០២៦-២៧ ដូច្នេះក្រុមជើងឯកលីគបាល់ទាត់កំពូលកម្ពុជា រដូវកាល ២០២៥-២៦ នឹងតំណាងឲ្យក្លិបកម្ពុជាប្រកួតពានរង្វាន់កម្រិតទី២។

ក្រៅពីសមិទ្ធភាពជាប្រវត្តិសាស្ត្រទាំង ៥ ចំណុចខាងលើ ក៏មានរឿងរ៉ាវល្អៗជាច្រើនទៀតសម្រាប់ក្លិបបាល់ទាត់កម្ពុជាដូចជាចំនួនអ្នកទស្សនាច្រើននៅវគ្គសន្សំពិន្ទុក្នុងពូល និងវគ្គខ្វែងតាំងពីរដូវកាលមុន រហូតដល់រដូវកាលនេះ។

ទោះបីជាយ៉ាងណា បើក្រឡេកមើលទៅក្រុមបាល់ទាត់ជម្រើសជាតិកម្ពុជាតាំងពីកម្រិត យុវជន រហូតដល់ ក្រុមជម្រើសដៃទី១ គឺធ្វើមិនបានល្អទេនៅក្នុងឆ្នាំ ២០២៥ ទាំងការប្រកួតពានរង្វាន់ផ្លូវការ និងមិត្តភាពអន្តរជាតិ៕

អត្ថបទ៖ វីរបុត្រ