ឆ្នាំ ២០២៦ បាល់ទាត់កម្ពុជាទាំងក្លិប និងជម្រើសជាតិ មមាញឹកក្នុងពានអន្តរជាតិ

នៅឆ្នាំ ២០២៦ អ្នកគាំទ្របាល់ទាត់ កម្ពុជា នឹងសប្បាយហ៊ោ តាម​រយៈ​ទស្សនាការ​ប្រកួត​របស់​ក្លិប និងជម្រើសជាតិ កម្ពុជា ដែលត្រូវមានកាលវិភាគប្រកួតមមាញឹកក្នុងពានអន្តរជាតិ។

ត្រឡប់ក្រោយបន្តិចទៅកាន់ឆ្នាំ ២០២៥ គឺក្រុមធំនៃជម្រើសជាតិ កម្ពុជា មិនសូវមានការប្រកួតច្រើនឡើយ ដោយមានត្រឹមការប្រកួតមិត្តភាពចំនួន ៤ ប្រកួតប៉ុណ្ណោះ ប៉ុន្តែបើនិយាយអំពីក្លិបវិញ មានការប្រកួតមមាញឹកច្រើនគួរ​ឱ្យ​កត់​សម្គាល់។ នៅពេលនោះ ព្រះខ័នរាជស្វាយរៀង ទទួលភារកិច្ចប្រកួតទាំងក្នុងពាន Shopee Cup និងពាន AFC Challenge League។

រឿងដ៏អស្ចារ្យបំផុត គឺ ព្រះខ័នរាជស្វាយរៀង បានឡើងទៅកាន់វគ្គផ្តាច់ព្រ័ត្រពាន ACGL ជាលើកដំបូង ប៉ុន្តែបានចាញ់ក្រុម FK Arkadag ក្នុងលទ្ធផល ១-២។ ដោយឡែកពានឈានចូលរដូវកាលថ្មី ក្រុម​កម្ពុជា មាន ២ ក្រុមគឺ ព្រះខ័នរាជស្វាយរៀង និង ភ្នំពេញក្រោន ទទួលបានកៅអីចូលលេងពាន ACGL នេះ។ បច្ចុប្បន្នក្រុមទាំង ២ សុទ្ធតែបានឆ្លងផុតវគ្គចែកពូល ដោយត្រូវជួបគ្នានៅវគ្គ ៨ ក្រុមចុងក្រោយ។

ក្រឡេកមកមើលឆ្នាំ ២០២៦ នេះវិញ បាល់ទាត់ កម្ពុជា កាន់តែមានភាពមមាញឹកជាងឆ្នាំមុនទៅទៀត ដោយទាំងជម្រើសជាតិ និងក្លិប សុទ្ធតែមានការប្រកួតពានសំខាន់ៗ។

ក្រុមជម្រើសជាតិ កម្ពុជា បន្ទាប់ពីស្ងប់ស្ងាត់ជាមួយការប្រកួតពានរង្វាន់ផ្លូវការនៅឆ្នាំ ២០២៥ ឈានចូលឆ្នាំ ២០២៦ នឹងត្រូវចូលរួមប្រកួតពានរង្វាន់ ASEAN Championship ដែលទើបប្រែឈ្មោះថ្មី ថា “ASEAN Hyundai Cup 2026″។ ការប្រកួតពាននេះ គ្រោងរៀបចំពីថ្ងៃទី ២៤ ខែ កក្កដា ដល់ថ្ងៃទី ២៦ ខែ សីហា។

ស្លេះអំពីជម្រើសជាតិ ងាកមកមើលក្លិបវិញម្តង ដោយក្នុងពានរង្វាន់ Shopee Cup ក្រុម ព្រះខ័នរាជស្វាយរៀង នៅសល់ ២ ប្រកួតទៀតក្នុងដៃសម្រាប់ការប្រកួតវគ្គសន្សំពិន្ទុក្នុងពូល។ នៅថ្ងៃទី ២៩ ខែ មករា ឆ្នាំ ២០២៦ ត្រូវជួបជាមួយក្រុម Bangkok United និងនៅថ្ងៃទី ៥ ខែ កុម្ភៈ ត្រូវជួបជាមួយក្រុម Lion City Sailor។ ប្រសិនបើ ក្រុមជើងឯក កម្ពុជា ទទួលបានកៅអីឡើងវគ្គបន្ត នោះនឹងមានការប្រកួតបន្តបន្ទាប់ទៀត។

ពានរង្វាន់ AFC Challe League នឹងមានការប្រកួតដ៏ជក់ចិត្តបំផុត ដោយក្រុមកម្ពុជា ២ គឺ ព្រះខ័នរាជស្វាយរៀង និង ភ្នំពេញក្រោន ត្រូវជួបគ្នា ២ ជើងក្នុងវគ្គ ៨ ក្រុមចុងក្រោយ។ ជើងទី ១ ត្រូវធ្វើនៅថ្ងៃទី ៥ ខែ​មីនា និងជើងទី ២ ត្រូវធ្វើនៅថ្ងៃទី ១២ ខែ មីនា ឆ្នាំ ២០២៦។ ដោយឡែក ពេលឈានចូលវគ្គពាក់កណ្តាលផ្តាច់ព្រ័ត្រ ប្រាកដណាស់រវាងក្រុមទាំង ២ នឹងមាន ១ ក្រុមបានឡើង។ ប្រសិនបើទទួលបានជ័យជម្នះ នោះនឹងមានការប្រកួតរបស់ក្រុម កម្ពុជា មួយទៀតនៅវគ្គផ្តាច់ព្រ័ត្រ។

មិនទាន់អស់នោះទេ នៅពេលឈានចូលរដូវកាលថ្មី ដែលស្ថិតនៅឆ្នាំ ២០២៦ ដដែល នឹងមានការប្រកួតបន្ថែមទៀតក្នុងពានរង្វាន់ក្លិបទ្វីប អាស៊ី លំដាប់ទី ២ AFC Champions League Two។ នៅរដូវកាលថ្មី ក្រុម កម្ពុជា ទទួលបានកៅអីចំនួន ១ កៅអីកន្លះ។ ដូច្នេះនឹងមាន ១ ក្រុមបានឡើងទៅវគ្គសន្សំពិន្ទុក្នុងពូលដោយស្វ័យប្រវត្តិ ហើយមួយក្រុមទៀតត្រូវប្រកួតជម្រុះ (Playoff)៕

អត្ថបទ៖ សេម កុសល