អ្នកគាំទ្រ ថា រាល់ពេល Win Streak ចាញ់ គឺអ្នកប៉ះសេ មិនសូវ​លើក​បាល់ឱ្យ វឿន វាសនា

អ្នកគាំទ្របាល់ទះ កម្ពុជា បានបញ្ចេញមតិដូចៗគ្នា ពីការបរាជ័យ ៤ លើករបស់ក្រុម Win Streak នៅក្នុងលីគបាល់ទះកំពូល តៃវ៉ាន់ រដូវកាលនេះ កើតឡើងដោយសារអ្នកលើកបាល់សញ្ជាតិ ថៃ Saranchit Charoensuk មិនសូវបោះបាល់ឱ្យកីឡាករកម្ពុជា វឿន វាសនា វាយផ្តាច់។

គិតត្រឹមសប្តាហ៍ទី ១៧ ដែលបានបញ្ចប់កាលពីចុងសប្តាហ៍កន្លងទៅ ក្រុមបាល់ទះ Win Streak បានចាញ់ចំនួន ៤ លើកហើយនៅរដូវកាលនេះ។ កាលពីថ្ងៃ សៅរិ៍ ទី ២៤ ខែ មករា ក្រុម​ Win Streak បានចាញ់ក្រុម Taipei East Power ៣ សិតទល់ ០។ ចំណែនៅថ្ងៃ អាទិត្យ ទី ២៥ បានចាញ់ក្រុម TSG SkyHawks ក្នុងលទ្ធផល ៣ សិតទល់ ០ ដូចគ្នា។

ក្រោយការបរាជ័យរបស់ Win Streak ២ ប្រកួតជាប់គ្នាបែបនេះ បានធ្វើឱ្យអ្នកគាំទ្រ កម្ពុជា ជាច្រើនបញ្ចេញមតិស្រដៀងៗគ្នា ថា រាល់ពេល Win Streak ចាញ់ គឺមកពី វឿន វាសនា មិនសូវមានបាល់វាយផ្តាច់។ មូលហេតុធំ ២ ធ្វើឱ្យ វាសនា មិនសូវមានបាល់លេង គឺដោយសារអ្នកបាំងបាល់ខាងគូប្រកួតចាំបិទ វាសនា ខ្លាំងពេក ហើយមួយទៀត អ្នកលើកបាល់ Saranchit Charoensuk មិនសូវចេញបាល់ឱ្យ វាសនា វាយផ្តាច់។

ផ្អែកតាមការលើកឡើងខាងលើ ឃើញថា ការប្រកួត ២ ប្រកួតចុងក្រោយនេះ វឿន វាសនា ពិតជាមិនសូវមានបាល់លេងច្រើននោះទេ។ ម្យ៉ាងវិញទៀត ស្មាត់កម្ពស់ ១.៩៦ ម៉ែត្រ រូបនេះក៏មិនបានជាប់នៅតំណែងកីឡាកររកពិន្ទុច្រើនជាងគេប្រចាំក្រុមផងដែរ ដោយការប្រកួតនីមួយៗរកបានមិនបានដល់ ១០ គ្រាប់ផង។

គួរឱ្យដឹង ថា ក្រុមបាល់ទាត់ Win Streak នៅតែបន្តឈរកំពូលតារាងក្នុងលីគកំពូល តៃវ៉ាន់ ទោះបានចាញ់់ ៤ ប្រកួតហើយក៏ដោយ ដោយឆ្លងកាត់ ៣២ ប្រកួត ពួកគេឈ្នះ ២៨ និងចាញ់ ៤។ ចំណែក វឿន វាសនា វិញ នៅតែបន្តឈរជាកីឡាករកពិន្ទុច្រើនជាងគេប្រចាំលីគកំពូល តៃវ៉ាន់ ដោយរកបានពិន្ទុសរុបចំនួន ៦៥០ ពិន្ទុ៕

អត្ថបទ៖ សេម កុសល