កុក បូរីស ក្លាយជាកីឡាករកម្ពុជាដំបូងគេ រកគ្រាប់បាល់លើស ៣គ្រាប់ នៅលីគបាល់ទាត់ម៉ាឡេស៊ី

កីឡាករកូនកាត់ខ្មែរបារាំង កុក បុរីស ដែលបច្ចុប្បន្នកំពុងលេងឱ្យក្លិប Sarawak United នៃលីគកំពូលម៉ាឡេស៊ី ក្នុងលក្ខខណ្ឌខ្ចីជើងពីក្លិបភ្នំពេញក្រោន បានក្លាយជាកីឡាករកម្ពុជា ដំបូងគេដែលអាចរកគ្រាប់បាល់លើស ៣គ្រាប់នៅប្រទេសដែលរីកចម្រើនបាល់ទាត់ក្នុងតំបន់អាស៊ានមួយនេះ។

បុរីស កំពុងតែធ្វើបានយ៉ាងល្អនៅលីគកំពូលម៉ាឡេស៊ី ដោយគិតមកទល់ពេលនេះរូបគេបានរកគ្រាប់បាល់បាន ៤គ្រាប់ហើយ ឱ្យក្រុមដែលមានមូលដ្ឋាននៅក្នុងរដ្ឋ Sarawak ក្នុងការបង្ហាញខ្លួនចំនួន ៧លើកទាំងលីគ (Malaysian Super league) និងខាប់ (Malaysia FA Cup)។

គ្រាប់បាល់ទាំង ៤គ្រាប់របស់គេ រកបាននៅក្នុងលីគកំពូលម៉ាឡេស៊ី (Malaysian Super league) ចំនួន ៣គ្រាប់ ខណៈនៅក្នុងពានរង្វាន់ខាប់ (Malaysia FA Cup) ចំនួន ១គ្រាប់ ដោយបំបែកកំណត់ត្រារបស់កីឡាករ ចាន់ វឌ្ឍនាកា ដែលរកគ្រាប់បាល់បានត្រឹមតែ ៣គ្រាប់នៅក្នុងលីគកំពូលម៉ាឡេស៊ីតែមួយគត់ ជាមួយក្លិប ២ផ្សេងគ្នា (Pahang FA និង PKNS) ស្មើនឹងការប្រកួតចំនួន ២៥ប្រកួត។

យ៉ាងណាមិញ ទោះបីជាគេរកគ្រាប់បាល់បានបន្ថែមទៀតក៏ដោយ ប៉ុន្តែលទ្ធផលចុងក្រោយរបស់ Sarawak United គឺបានចាញ់ក្លិប Negeri Sembilan លទ្ធផល ១-២ លើទឹកដីរបស់ខ្លូន នៃជំនួបសប្ដាហ៍ទី៧ លីគកំពូលម៉ាឡេស៊ី។

ជាមួយនឹងការរកគ្រាប់បាល់បានជាបន្តបន្ទាប់ ប៉ុន្តែពុំអាចជួយក្រុមឱ្យឈ្នះនេះ កុក បូរីស បាននិយាយយ៉ាងដូច្នេះថា៖ «ទោះបីជាខ្ញុំស៊ុតបានគ្រាប់ទី៤ របស់ខ្ញុំនៅម៉ាឡេស៊ី គ្រាប់ទី៣ ក្នុងការប្រកួត Malaysian Super League 2022 នៅយប់នេះក៏ដោយ។ ចិត្តខ្ញុំមិនមានអារម្មណ៍រីករាយទេ។ នោះមិនគ្រប់គ្រាន់ទេក្នុងការនាំយកជ័យជម្នះ និងរាត្រីដ៏អស្ចារ្យសម្រាប់ក្លិបរបស់ខ្ញុំ និងអ្នកគាំទ្រ Sarawak។»

គួរបញ្ជាក់ថា បច្ចុប្បន្នក្លិប Sarawak United របស់កីឡាករកូនកាត់ខ្មែរបារាំងរូបនេះ កំពុងឈរនៅលេខ១១ នៃតារាងចំណាត់ថ្នាក់លីគដែលមាន ១២ក្រុម ក្រោយប្រកួតបាន ៧ដង ឈ្នះ១ ស្មើ១ និងចាញ់៥ មាន ៤ពិន្ទុ។

សូមរំឮកថា លីគបាល់ទាត់ម៉ាឡេស៊ី មានកីឡាករកម្ពុជា ៤នាក់ហើយដែលទៅប្រកបអាជីពនៅទីនោះរួមមាន ធារី ចន្ថាប៊ីន (រកបាន ២គ្រាប់), កែវ សុខផេង (រកបាន ១គ្រាប់), ប្រាក់ មុន្នីឧត្តម (ពុំអាចរកគ្រាប់បាល់បាន) និងចាន់ វឌ្ឍនាកា ជាថ្មីម្ដងទៀត (រកគ្រាប់បាល់បាន ៣គ្រាប់)៕

អត្ថបទ៖ មន្នីរ័ត្ន