កីឡា

លោក Lee Tae-hoon មិនជោគជ័យនៅកម្ពុជា សាជាថ្មីក្រោយត្រូវវិសាខា ប្រកាសចែកផ្លូវ

បានផុស

៤ years មុន

នៅ

ថ្ងៃព្រហស្បតិ៍ ១២ ឧសភា ២០២២

ដោយ

អតីតគ្រូបង្វឹកនៃក្រុមជម្រើសជាតិកម្ពុជា អំឡុងឆ្នាំ ២០១០-២០១៧ លោក Lee Tae-hoon មិនជោគជ័យនៅកម្ពុជាសាជាថ្មី បន្ទាប់ពីត្រូវបានក្លិបវិសាខា ប្រកាសចែកផ្លូវជាផ្លូវការនៅថ្ងៃទី១២ ខែឧសភា ឆ្នាំ២០២២ នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Lee Tae-hoon បានចូលមកដឹកនាំក្លិបវិសាខា កាលពីចុងឆ្នាំ២០២១ ប៉ុន្តែចាប់តាំងពីលោកចូលមកដឹកនាំក្រុមមានមូលដ្ឋាននៅភាគជើងរាជធានីភ្នំពេញមួយនេះ គឺពុំសូវធ្វើបានលទ្ធផលល្អឡើយនៅក្នុងលីគ។ គិតត្រឹមជុំទី១ ៧ប្រកួត លោកដឹកនាំឈ្នះតែ ៣ប្រកួត ស្មើ១ និងចាញ់ ៣ប្រកួត នេះហាក់ខុសពីការគិតរបស់អ្នកគាំទ្រ ដែលរំពឹងថានឹងធ្វើបានល្អ បន្ទាប់ពីក្លិបចំណាយធនធានយ៉ាងច្រើនលើការនាំចូលកីឡាករ។

ការចែកផ្លូវមុនកាលកំណត់កិច្ចសន្យាដូច្នេះ បានធ្វើឱ្យគ្រូបង្វឹកសញ្ជាតិកូរ៉េខាងត្បូងរូបនេះ ទទួលបានមតិលើកឡើងថា ហាក់ពុំសូវជោគជ័យនៅកម្ពុជា បន្ទាប់ពីលោកក៏ទើបតែត្រូវបាន សមាគមកីឡាបាល់ទាត់កងយោធពលខេមរភូមិន្ទ បញ្ចប់កិច្ចសន្យាមុនកាលកំណត់ដូចគ្នា កាលពីចុងរដូវកាល២០២១។

លោក Lee Tae-Hoon ធ្លាប់បានចំណាយពេល ៧ឆ្នាំ ដឹកនាំក្រុមជម្រើសជាតិកម្ពុជា ចាប់ពីឆ្នាំ២០១០ ដល់ឆ្នាំ២០១៧ មុនផុតកិច្ចសន្យាជាមួយសហព័ន្ធកីឡាបាល់ទាត់កម្ពុជា។ លោកក៏ធ្លាប់បានដឹកនាំក្រុមយុវជនអាយុក្រោម ១៥ឆ្នាំនៃសាលាបាល់ទាត់ជាតិបាទី បានមួយរយៈផងដែរ មុនចាកចេញនៅចុងឆ្នាំ២០១៨។

ក្រោយចាកចេញពីបាល់ទាត់កម្ពុជា លោកក៏បានទៅបំពេញការងារជាមួយក្លិប Hoang Anh Gia Lai – HAGL នៃក្របខណ្ឌលីគកំពូលវៀតណាម កាលពីឆ្នាំ២០១៩-២០២០ កន្លងទៅ មុនត្រឡប់មកប្រកបអាជីពជាថ្មីនៅកម្ពុជា នៅឆ្នាំ២០២១ កន្លងទៅថ្មីៗនេះ៕

អត្ថបទ ៖ មន្នីរ័ត្ន