កីឡា

សម្តេចតេជោបញ្ជាក់ថា អាស៊ានពិតជាមានបំណងដេញថ្លៃធ្វើម្ចាស់ផ្ទះ World Cup ឆ្នាំ…

បានផុស

៣ years មុន

នៅ

ថ្ងៃពុធ ១៥ មិថុនា ២០២២

ដោយ

សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានបញ្ជាក់ពីគោលបំណងដែលប្រទេសអាស៊ីអាគ្នេយ៍ចង់ដេញថ្លៃធ្វើជាម្ចាស់ផ្ទះរៀបចំការប្រកួតបាល់ទាត់ជើងឯកពិភពលោក (FIFA WORLD CUP) សម្រាប់ឆ្នាំ២០៣៤ ឬ ២០៣៨។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការថ្លែងឲ្យដឹងនេះនៅពេលសម្តេចតេជោ ហ៊ុន សែន បានអញ្ជើញជាអធិបតីក្នុងព្រឹត្តិការណ៍ដំណើរទេសចរណ៍ ពានរង្វាន់បាល់ទាត់ពិភពលោក (FIFA WORLD CUP) ឆ្លងកាត់ព្រះរាជាណាចក្រកម្ពុជាជាលើកដំបូងនាថ្ងៃទី១៥ ខែមិថុនា ឆ្នាំ២០២២នេះ នៅវិមានសន្តិភាព រាជធានីភ្នំពេញ។

ក្នុងសុន្ទរកថា សម្តេចតេជោ ហ៊ុន សែន មានប្រសាសន៍ថា ៖«សម្រាប់២០២២នេះ ក្នុងនាមខ្ញុំជាប្រធានអាស៊ាន ខ្ញុំចង់ឃើញអាស៊ានមានចក្ខុវិស័យ និងផែនការដេញថ្លៃធ្វើម្ចាស់ផ្ទះ នៃការប្រកួតបាល់ទាត់ពិភពលោក នៅឆ្នាំ២០៣៤ ឬ២០៣៨ ដែលខ្ញុំនឹងពិនិត្យមើលទ្ធភាព ស្នើសុំឲ្យបណ្តាប្រមុខរដ្ឋ ប្រមុខរដ្ឋាភិបាលអាស៊ានគាំទ្រ ជំរុញគំនិតផ្តួចផ្តើមនេះឲ្យក្លាយជាការពិត»។

សម្តេចតេជោបានបញ្ជាក់ថា ៖«ខ្ញុំគួរតែបញ្ជាក់ជូនថា បន្តិចទៀត ខ្ញុំនឹងធ្វើជាបញ្ជូនតាមរយៈលោក Karembeu នូវអាវរបស់ខ្ញុំដែលបានទទួលពីអគ្គនាយក FIFA ក្នុងពេលចុះហត្ថលេខារវាងអាស៊ាន និង FIFA នៅទីក្រុងបាំងកក ឆ្នាំ២០១៩កន្លងទៅ។ អាស៊ានពិតជាមានបំណងដើម្បីនឹងរួមគ្នាដេញថ្លៃធ្វើម្ចាស់ផ្ទះ ហើយខ្ញុំនឹងជំរុញនូវគំនិតផ្តួចផ្តើមនេះ»។

សូមបញ្ជាក់ថា ពានរង្វាន់បាល់ទាត់ពិភពលោក FIFA World Cup Trophy បានដង្ហែមកដល់ប្រទេសកម្ពុជា នៅព្រឹកថ្ងៃទី១៥ ខែមិថុនា ឆ្នាំ២០២២នេះតាមជើងយន្តហោះពិសេស ហើយនឹងដង្ហែទៅពហុកីឡដ្ឋានជាតិមរតកតេជោដើម្បីដាក់តាំងឲ្យមហាជនចូលទស្សនា ថតរូប ដូចជាមានការប្រគំតន្ត្រីដើម្បីអបអរសាទរផងដែរគិតចាប់ពីម៉ោង១រសៀលរហូតដល់ម៉ោង១០យប់៕

អត្ថបទ៖ វីរបុត្រ

Related Topics:សម្ដេចតេជោ ហ៊ុន សែន