U-19 កម្ពុជា កោះហៅកីឡាករ៤រូបបន្ថែមទៀតទៅជួយក្រុម ត្រៀមប៉ះឡាវ

កីឡាករចំនួន៤រូបត្រូវបានគ្រូបង្វឹកនៃក្រុមជម្រើសជាតិកម្ពុជា អាយុក្រោម១៩ឆ្នាំ លោក Koji Gyotoku កោះហៅទៅរួមក្រុម ដើម្បីការប្រកួតពានរង្វាន់ជើងឯកយុវជនអាយុក្រោម១៩ឆ្នាំអាស៊ាន (AFF U-19 Boys Championship 2022) នៅប្រទេសឥណ្ឌូនេស៊ី។

នៅព្រឹកថ្ងៃទី០៦ ខែកក្កដា សហព័ន្ធកីឡាបាល់ទាត់កម្ពុជា បានធ្វើការកោះហៅកីឡាករ៤រូបបន្ថែមទៅជួយក្រុម ក្នុងនោះមកពីក្លិប ៤ផ្សេងៗពីគ្នា រួមមាន កីឡាករ អៀម រតនា របស់ក្លិបសូលទីឡូអង្គរ, កីឡាករ សូគ្រី សូហ្វាន់ របស់ក្លិបអង្គរថាយហ្គឺរ, កីឡាករ គង់ លីហ៊ួរ របស់ក្លិបខេត្តព្រៃវែង និងអ្នកចាំទី សាំង ហាន់ឃុន របស់ក្លិបវិសាខា។

មកទល់ពេលនេះពួកគេទាំង ៤នាក់បានទៅដល់ប្រទេសឥណ្ឌូនេស៊ីហើយ និងបានចូលរួមហ្វឹកហាត់ជាមួយក្រុមផងដែរ។ នេះជាការបន្ថែមកីឡាករ ដ្បិតបញ្ជីនៃការចុះឈ្មោះប្រកួតពានរង្វាន់ដដែលនេះ គឺត្រូវបានអនុញ្ញាត ដោយសារបញ្ហាកូវីដ-១៩។

មកទល់ពេលនេះ U-19 កម្ពុជា ប្រកួតបាន ២លើកហើយ ក្នុងនោះឈ្នះ១ (សិង្ហបុរី ១-០) និងចាញ់១​ (ម៉ាឡេស៊ី ២-១)​មាន ៣ពិន្ទុឈរលេខ៣ ក្នុងពូល B។ ប្រកួតបន្ទាប់នឹងត្រូវជួបឡាវ នាល្ងាចថ្ងៃទី០៧ ខែកក្កដា ឆ្នាំ២០២២ វេលាម៉ោង​៧យប់៕

អត្ថបទ៖ មន្នីរ័ត្ន