Ronaldo ត្រៀមលក់យន្តហោះឯកជនសំណព្វចិត្ត ក្រោមហេតុផលមួយ

សារព័ត៌មាន The Sun របស់អង់គ្លេសបានរាយការណ៍ថា Cristiano Ronaldo កំពុងរៀបចំលក់យន្តហោះឯកជន ដែលលោកចូលចិត្តបំផុត ក្នុងតម្លៃជិត២៤លានដុល្លារ ដោយ​ហេតុផល​ថាវា​តូច​ពេក។

ខ្សែ​ប្រយុទ្ធ​ក្រុម Manchester United វ័យ ៣៧ឆ្នាំរូបនេះ ​បានទិញយន្តហោះ Gulfstream G200 ក្នុងតម្លៃ ៨ ខ្ទង់ ​ចាប់តាំងពីឆ្នាំ២០១៥ ខណៈយន្តហោះនេះ​បាន​នាំ​យក Ronaldo និង​គូស្នេហ៍ Georgina Rodriguez ព្រមទាំងកូនៗ ធ្វើដំណើរវិស្សមកាលនៅទូទាំងទ្វីបអឺរ៉ុប។

របាយការណ៍​បញ្ជាក់​ថា Ronaldo តែងតែ​ប្រើ​យន្តហោះ​នេះ ​ដើម្បី​ហោះ​ទៅ​និង​ត្រឡប់​ទៅ​ស្រុក​កំណើត​ក្នុង​ប្រទេស​ព័រទុយហ្គាល់ ជាមួយ​នឹង​ល្បឿន​អតិបរមា ៥៦០ ម៉ាយ​ក្នុង​មួយ​ម៉ោង។ ​ទោះបី​ជា​វា​អាច​ផ្ទុក​អ្នកដំណើរ​បាន ៨-១០ នាក់ ប៉ុន្តែ​លោកកំពុង​ស្វែងរក​យន្តហោះ​ថ្មី ទំនើប និង​ធំ​ជាង​នេះ​ទៅទៀត។

ព័ត៌មានក៏បង្ហាញផងដែរថា Gulfstream G200 ក៏ជាយន្តហោះឯកជន​ដ៏កម្រ មានតែ​យន្តហោះ​ចំនួន ២៥០គ្រឿង​ប៉ុណ្ណោះ​ដែលត្រូវបានបញ្ឈប់នៅឆ្នាំ ២០១១។ ​យន្តហោះយក្ស​ដ៏​ប្រណិត​មួយនេះ សំបូរទៅ​ដោយគ្រឿងបរិក្ខារដូចជា Wi-Fi ទូរស័ព្ទ ម៉ាស៊ីនទូរសារ ឡ​ចំហាយអគ្គិសនី មីក្រូវ៉េវ ទូទឹកកក និង​ប្រព័ន្ធ​កម្សាន្ត​ទំនើបៗ​ផ្សេងទៀតដែរ។

ទោះជាយ៉ាងណាក៏ដោយ តារាបាល់ទាត់រូបនេះ មិន​ប្រញាប់ប្រញាល់​លក់​ទេ ប្រសិន​បើ​លោក​មិន​ទទួល​បាន​តម្លៃ​ដូច​ដែល​ចង់​បាន ហើយ​លោកត្រៀម​ទុក​សម្រាប់​អ្នក​ដែល​ចាប់​អារម្មណ៍តែប៉ុណ្ណោះ៕

ប្រែសម្រួល៖ សាង ស្រីល័ក្ខ

ប្រភព៖Sanook

ចុចអាន៖រថយន្ត Bugatti តម្លៃរាប់លានដុល្លាររបស់ Ronaldo ជួបឧបទ្ទវហេតុបុកជញ្ជាំង ខ្ទេចខាងមុខគ្មានសល់