U-20 កម្ពុជា ត្រូវការឈ្នះ U-20 តាជីគីស្ថាន ដាច់ខាតយប់នេះ

ក្រុមបាល់ទាត់ជម្រើសជាតិកម្ពុជា អាយុក្រោម ២០ឆ្នាំ នឹងបន្តការប្រកួតចុងក្រោយ ប្រចាំពូល I របស់ខ្លួនក្នុងវគ្គជម្រុះ ពានរង្វាន់យុវជនអាយុក្រោម ២០ឆ្នាំអាស៊ី (AFC U-20 Asian Cup) ទល់នឹងម្ចាស់ផ្ទះ U-20 តាជីគីស្ថាន នាល្ងាចថ្ងៃទី១៨ កញ្ញា នេះ។

ការប្រកួតនឹងធ្វើឡើងនៅវេលាម៉ោង ១០:០០យប់ នៅកីឡដ្ឋាន Pamir Stadium រដ្ឋធានី Dushanbe ខណៈនឹងមានការផ្សាយផ្ទាល់តាមរយៈផេក សហព័ន្ធកីឡាបាល់ទាត់កម្ពុជា ខណៈនេះជាការប្រកួតកាត់​សេចក្ដីរកក្រុមឡើងវគ្គបន្ត ដោយកម្ពុជា ត្រូវការឈ្នះដាច់ខាត ខណៈតាជីគីស្ថាន ត្រូវការត្រឹមតែ​ស្មើក៏អាចឡើងជុំបន្តបានផងដែរ។

ឆ្លងកាត់ការប្រកួត ២លើក U-20 កម្ពុជា ធ្វើមិនសូវបានល្អឡើយ ដោយចាញ់១ និងស្មើ១ ស្របពេលដែល U-20 តាជីគីស្ថាន ធ្វើបានល្អជាង ដោយស្មើ១ និងឈ្នះ១ ជាពិសេសនោះគេបានយកឈ្នះលីបង់ (លីបង់ បានយកឈ្នះកម្ពុជា កាលពីប្រកួតបើកឆាក ១-០) ដោយលទ្ធផល ៤-០ ថែមទៀតផង។

បច្ចុប្បន្ននេះ តាជីគីស្ថាន ឈរកំពូលតារាងមាន ៤ពិន្ទុ ខណៈកម្ពុជា ឈរបាតតារាងមានតែ ១ពិន្ទុប៉ុណ្ណោះ។ U-20 កម្ពុជា ហាក់ដូចជាស្ដួចស្ដើងសម្រាប់ឱកាសឈរកំពូលតារាង ប៉ុន្តែនៅមានឱកាសឈរលេខ២ ក្នុងពូល តាមរយៈការធ្វើយ៉ាងណាឈ្នះប្រកួតចុងក្រោយនេះ ហើយក៏ត្រូវអ៊ុតយ៉ាងណាការប្រកួតរវាង U-20 សិង្ហបុរី ជាមួយ លីបង់ ស្មើគ្នា។

គួររំលឹកថា U-20 កម្ពុជា ស្ថិតនៅពូលជាមួយម្ចាស់ផ្ទះពូល I តាជីគីស្ថាន, លីបង់ និងសិង្ហបុរី  ខណៈដើម្បីបានឡើង​ទៅវគ្គបន្ត U-20 កម្ពុជា ដាច់ខាតត្រូវតែឈរលេខ១ ក្នុងពូល ជាកៅអីឡើងដោយស្វ័យប្រវត្តិ ខណៈក៏អាចឡើងផងដែរ ក្នុងនាមជាក្រុមលេខ២ល្អ ដោយត្រូវប្រៀបធៀបជាមួយពូលចំនួន ៩ផ្សេងទៀត ហើយយកតែ ៥ក្រុមប៉ុណ្ណោះឡើងទៅ​ជុំផ្ដាច់ព្រ័ត្រ ដែលគេប្រកួតនៅប្រទេសអ៊ូសបីគីស្ថាន នាខែមីនា ឆ្នាំ២០២៣៕

អត្ថបទ៖ មន្នីរ័ត្ន