កីឡា

ហេតុអ្វីបានជា U23 សាកលវិទ្យាល័យជប៉ុនខ្លាំង?

បានផុស

២ years មុន

នៅ

ថ្ងៃពុធ ២១ កញ្ញា ២០២២

ដោយ

ក្រុមបាល់ទាត់ជប៉ុនអាយុក្រោម២៣ឆ្នាំដែលជ្រើសរើសចេញពីក្រុមបាល់ទាត់សាកលវិទ្យាល័យនានាបានយកឈ្នះក្រុមបាល់ទាត់ជម្រើសជាតិកម្ពុជា (U23) ដោយលទ្ធផល ១-៣ ក្នុងការប្រកួតមិត្តភាពអន្តរជាតិ កាលពីយប់មិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកគាំទ្រមួយចំនួនអាចមានទស្សនៈអ្វីមួយលើក្រុម U23 ជប៉ុន ដែលមិនមែនជាក្រុមបាល់ទាត់ជម្រើសជាតិជប៉ុនអាយុក្រោម២៣ឆ្នាំសុទ្ធនោះទេ ប៉ុន្តែក្រុមកីឡាករដែលជ្រើសរើសចេញពីសាកលវិទ្យាល័យនានានៅក្នុងប្រទេសជប៉ុន។

ប៉ុន្តែការពិតបង្ហាញលើទីលានឃើញថា ក្រុម U23 សាកលវិទ្យាល័យជប៉ុនមានកម្រិតគុណភាពខ្ពស់ជាងក្រុម U23 កម្ពុជា។ គ្រាន់តែបង្ហាញខ្លួនលើទីលានភ្លាម កាយសម្បទា និងមាឌរបស់ក្រុម U23 ជប៉ុន មានប្រៀបលើក្រុម U23 កម្ពុជាមួយទៅហើយ។ នៅពេលលេងលើទីលាន ក្រុម U23 ជប៉ុនមានបច្ចេកទេសល្អ ល្បឿនលឿន យល់ចិត្តគ្នា និងបញ្ចប់ទីច្បាស់ដែលមើលទៅគឺជាក្រុមបាល់ទាត់អាជីពពិតប្រាកដ។

ការបង្ហាញខ្លួនលក្ខណៈអាជីពពិតប្រាកដរបស់ U23 សាកលវិទ្យាល័យជប៉ុនមិនមែនជារឿងចៃដន្យនោះទេ។ ក្រៅពីការបណ្តុះបណ្តាលថ្នាលយុវជនរបស់ជម្រើសជាតិ ក្លឹប និងសាលាបាល់ទាត់នានា វិស័យបាល់ទាត់ជប៉ុនមានប្រព័ន្ធមួយ គឺ«កីឡាករពិសេសជាគោលដៅលីគ (J.League Designated Special Players) បានចាប់ផ្តើមតាំងពីឆ្នាំ១៩៩៨មក។ ប្រព័ន្ធនេះអនុញ្ញាតឲ្យកីឡាកររៀនសូត្រផង និងលេងបាល់ទាត់អាជីពផង។

យុវជនដែលមានទេពកោសល្យបំផុតត្រូវចុះឈ្មោះចាប់ពី១៨ឆ្នាំជាមួយសមាគមសាកលវិទ្យាល័យជប៉ុន សហព័ន្ធអត្តពលិកវិទ្យាល័យដែលពួកគេរៀន ឬក៏សហព័ន្ធក្លឹបយុវជនជប៉ុនកម្រិតពីរ និងមិនទាន់ចុះឈ្មោះចូលរួមជាមួយក្លឹបបាល់ទាត់អាជីពណាមួយ។

បន្ទាប់មកពួកគេអនុញ្ញាតឲ្យក្លឹបមកពីលីគជប៉ុនអាចជ្រើសរើសយកកីឡាករពីក្រុមសាកលវិទ្យាល័យទាំងនោះច្រើនបំផុតត្រឹម៣នាក់ទៅហ្វឹកហាត់ និងប្រកួតក្នុងពានរង្វាន់ផ្សេងៗ។ ប្រសិនបើក្លឹបពិនិត្យឃើញកីឡាករណាម្នាក់មានទេពកោសល្យ និងបំពេញតាមលក្ខខណ្ឌ ក្លឹបនោះនឹងចុះកុងត្រាយកធ្វើជាកីឡាករអាជីពតែម្តង។

ក្រោយចុះកុងត្រាជាផ្លូវការ ពួកគេមានសិទ្ធិចូលរួមប្រកួតជាផ្លូវការក្នុងលីគទី១ លីគទី២ លីគទី៣ ពានរង្វាន League Cup ការប្រកួតត្រៀមរដូវកាល ឬពានរង្វាន់ផ្សេងៗទៀតដែលរៀបចំដោយសមាគមន៍កីឡាបាល់ទាត់ជប៉ុន និងលីគជប៉ុន។

ក្រុមបាល់ទាត់សាកលវិទ្យាល័យនានានៅជប៉ុនមានពានពានរង្វាន់លីគបាល់ទាត់សាកលវិទ្យាល័យគឺ Kantō University Soccer League កម្រិត១ និងកម្រិត២ដែលរៀបចំការប្រកួតជារៀងរាល់ឆ្នាំតាំងពីឆ្នាំ២០១១។ ដូច្នេះក្រុមសាកលវិទ្យាល័យមានការហ្វឹកហាត់ បណ្តុះបណ្តាលកម្រិតស្តង់ដា និងកម្រិតអាជីព ព្រមទាំងមានលីគសាកលវិទ្យាល័យយ៉ាងទៀងទាត់ទៀតផង។

និយាយពីក្រុម U23 ជប៉ុនដែលលេងជាមួយក្រុម U23 កម្ពុជាយប់មិញ មានកីឡាករមួយចំនួនបានចុះកុងត្រាជាមួយក្លឹបអាជីពជប៉ុនរួចរាល់ដែរ។ ពួកគេនឹងលេងពេញលេញក្រោយបញ្ចប់ការសិក្សានៅឆ្នាំ២០២៣។