កីឡា

តើ កាតា រួចរាល់ក្នុងការធ្វើជាម្ចាស់ផ្ទះ FIFA World Cup ហើយឬនៅ?

បានផុស

៣ years មុន

នៅ

ថ្ងៃព្រហស្បតិ៍ ១៧ វិច្ឆិកា ២០២២

ដោយ

អ៊ិន ពិសី

អ្នកគាំទ្រជាង ១ លាននាក់ ត្រូវបានគេរំពឹងថា នឹងទៅទស្សនាប្រទេស នៃរដ្ឋឈូងសមុទ្រ ក្នុងអំឡុងពេលការប្រកួតពេញមួយខែ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកគាំទ្រ និងក្រុមបាល់ទាត់ បានចាប់ផ្ដើមមកដល់ប្រទេសកាតា ខណៈប្រទេសនៅមជ្ឈិមបូព៌ារៀបចំធ្វើជាម្ចាស់ផ្ទះព្រឹត្តិការណ៍បាល់ទាត់ពិភពលោក (FIFA World Cup) ឆ្នាំ ២០២២ លើកដំបូង ដែលនឹងចាប់ផ្ដើមនៅថ្ងៃអាទិត្យ។

ប្រទេសកាតា ជាប្រទេសមានប្រជាជនតិចជាង ៣ លាននាក់ បានទទួលសិទ្ធិធ្វើជាម្ចាស់ផ្ទះការប្រកួតដែលមាន ៣២ ក្រុមមកពីជុំវិញ កាលពីឆ្នាំ ២០១០។ ចាប់តាំងពីពេលនោះមក ប្រទេសនេះ បានឆ្លងកាត់ការផ្លាស់ប្ដូរជាច្រើន ដើម្បីរៀបចំសម្រាប់ព្រឹត្តិការណ៍ដ៏ធំប្រចាំពិភពលោក។

ដូច្នេះ តើប្រទេសកាតាបានត្រៀមខ្លួនជាស្រេចក្នុងការធ្វើជាម្ចាស់ផ្ទះ នៃការប្រកួតបាល់ទាត់ពិភពលោកហើយឬនៅ?

-កីឡដ្ឋាន ៖

ការប្រកួត នឹងត្រូវលេងនៅលើកីឡដ្ឋានចំនួន ៨។ កាតា ដែលជាប្រទេសដំបូងគេនៅមជ្ឈិមបូព៌ា ធ្វើម្ចាស់ផ្ទះការប្រកួតនោះ បានជួលមនុស្សដោយផ្ទាល់ជាង ២៦,០០០ នាក់ ដើម្បីរៀបចំកីឡដ្ឋានសម្រាប់ការប្រកួតខែវិច្ឆិកា និងធ្នូ។

ពហុកីឡដ្ឋានទំនើបថ្មីចំនួន ៨ ដែលមានបច្ចេកវិជ្ជាខ្យល់ត្រជាក់ ត្រូវបានសាងសង់តាំងពីដំបូងសម្រាប់ព្រឹត្តិការណ៍នេះ។

-កន្លែងស្នាក់នៅ ៖

មានការព្រួយបារម្ភថា ប្រទេសនេះ ប្រហែលជាមិនមានកន្លែងស្នាក់នៅគ្រប់គ្រាន់សម្រាប់ការរំពឹងទុក នៃលំហូរអ្នកគាំទ្របាល់ទាត់ក្នុងអំឡុងពេលការប្រកួត។ ប៉ុន្តែក្នុងរយៈពេល ១២ ឆ្នាំ កន្លងមកនេះ អ្នករៀបចំបានសាងសង់សណ្ឋាគារ អាផាតមិន វីឡា និងហេដ្ឋារចនាសម្ព័ន្ធ ដើម្បីរៀបចំសម្រាប់ព្រឹត្តិការណ៍ដ៏ធំនេះ។

អ្នករៀបចំក៏បានអនុញ្ញាតឲ្យប្រជាជន យកផ្ទះ និងបន្ទប់សម្រាប់ជួលក្នុងគោលបំណងបន្ធូរបន្ថយកង្វល់កន្លែងស្នាក់នៅ។ អ្នកគាំទ្រក៏នឹងអាចស្នាក់នៅលើកប៉ាល់ទេសចរណ៍ និងនៅកន្លែងនានាក្នុងវាលខ្សាច់ផងដែរ។ យ៉ាងហោចណាស់មានសណ្ឋាគារអណ្ដែតទឹកចំនួន ៣ បានចូលចតនៅ Doha ដែលមានសមត្ថភាពគ្រែប្រហែល ១០,០០០។

អាជ្ញាធរក៏បាននិយាយថា អ្នកគាំទ្រមួយចំនួននឹងអាចស្នាក់នៅក្នុងតង់ទំនើបចំនួន ១,០០០ តង់ ត្រូវបានសាងសង់នៅលើកោះ ដែលបង្កើតឡើងដោយមនុស្សនៅភាគខាងជើង នៃទីក្រុងដូហា។

-ការដឹកជញ្ជូន ៖

ក្នុងការឈានទៅកាន់ការប្រកួតនេះ ប្រទេសកាតា បានវិនិយោគយ៉ាងខ្លាំងក្នុងការធ្វើឲ្យប្រសើរឡើងនូវបណ្ដាញដឹកជញ្ជូនរបស់ខ្លួន។ ម្ចាស់ផ្ទះបានសាងសង់ប្រព័ន្ធរថភ្លើងក្រោមដី ដែលត្រូវបានដាក់ឲ្យដំណើរការក្នុងឆ្នាំ ២០១៩ សាងសង់ផ្លូវហាយវេធំៗ និងបានសម្ពោធប្រព័ន្ធរថភ្លើងមុនការប្រកួតផងដែរ។

ការប្រកួតឆ្នាំ ២០២២ នឹងក្លាយជាការប្រកួតបាល់ទាត់ពិភពលោក ដែលមានទំហំដីតូចជាងគេបំផុតក្នុងប្រវត្តិសាស្ត្រ ដោយកីឡដ្ឋានទាំង ៨ ស្ថិតក្នុងរង្វង់ ៥៥ គីឡូម៉ែត្រ នៃទីក្រុងដូហា។ អ្នកគាំទ្រនឹងអាចចូលរួមទស្សនាការប្រកួតច្រើនជាងមួយ ក្នុងមួយថ្ងៃ ប្រសិនបើពួកគេចង់។

កីឡដ្ឋាន ៥ ក្នុងចំណោមកីឡដ្ឋានចំនួន ៨ ត្រូវបានតភ្ជាប់ដោយផ្ទាល់ទៅផ្លូវរថភ្លើងក្រោមដី ដោយផ្នែកដែលនៅសល់ ត្រូវបានតភ្ជាប់ដោយការរួមបញ្ចូលគ្នា នៃសេវារថភ្លើងក្រោមដី និងរថយន្តក្រុង។

ឡានក្រុងចំនួន ៤,០០០ គ្រឿង រួមទាំងរថយន្តអគ្គិសនីចំនួន ៧០០ គ្រឿង នឹងត្រូវប្រើប្រាស់សម្រាប់ដឹកជញ្ជូនអ្នកដំណើររវាងមជ្ឈមណ្ឌលដឹកជញ្ជូន និងពហុកីឡដ្ឋាន។ យោងតាមអ្នករៀបចំ អ្នកដំណើរប្រហែល ៥០,០០០ នាក់ ក្នុងមួយថ្ងៃ ត្រូវបានគេរំពឹងថា នឹងប្រើប្រាស់ឡានក្រុង ក្នុងអំឡុងពេលការប្រកួតបាល់ទាត់ពិភពលោក។

-សន្តិសុខ ៖

ប្រទេសកាតា កំពុងដាក់ពង្រាយបុគ្គលិកសន្តិសុខរាប់ម៉ឺននាក់ សម្រាប់ការប្រកួតបាល់ទាត់ពិភពលោក។ វាបានចុះហត្ថលេខាលើកិច្ចព្រមព្រៀងសហប្រតិបត្តិការសន្តិសុខជាមួយប្រទេសមួយចំនួន។

ប្រទេសទួរគី បានផ្តល់មន្ត្រីប៉ូលិស ហើយប៉ាគីស្ថាន បានបញ្ជូនទាហាន ដែលនឹងប្រតិបត្តិការក្រោមការបញ្ជារបស់កាតា។ ប្រទេសជាច្រើនដែលចូលរួមក៏កំពុងបញ្ជូនគណៈប្រតិភូប៉ូលិសផងដែរ។

កាលពីខែមុន កងកម្លាំងសន្តិសុខកាតា រួមជាមួយនឹងដៃគូ បានធ្វើសមយុទ្ធសន្តិសុខរយៈពេលប្រាំថ្ងៃ នៅទូទាំងប្រទេស។ The Peninsula daily បានរាយការណ៍ថា សមយុទ្ធនេះ មានគោលបំណងសាកល្បងការត្រៀមខ្លួន និងការឆ្លើយតប នៃសេវាសង្គ្រោះបន្ទាន់។

យោងតាមគណៈកម្មាធិការសន្តិសុខ នៃការប្រកួត សមយុទ្ធនេះ មានឈ្មោះថា Watan (ដែលបកប្រែជាជាតិជាភាសាអារ៉ាប់) មានការចូលរួមពីបុគ្គលិកសន្តិសុខរដ្ឋាភិបាល ចំនួន ៣២,០០០ នាក់ និង ១៧,០០០ នាក់ មកពីផ្នែកសន្តិសុខឯកជន៕

ប្រភព ៖ aljazeera.com

អត្ថបទ ៖ មន្នីរ័ត្ន