កីឡា

វគ្គផ្តាច់ព្រ័ត្រនៅថ្ងៃអាទិត្យនេះ គឺជាការប្រកួត World Cup ចុងក្រោយ ក្នុងជីវិតរបស់ Messi

បានផុស

៣ years មុន

នៅ

ថ្ងៃពុធ ១៤ ធ្នូ ២០២២

ដោយ

កីឡាករ Lionel Messi បានបញ្ជាក់ថា គាត់នឹងលេងការប្រកួត World Cup ជាលើកចុងក្រោយបង្អស់ នៅពេលអាហ្សង់ទីនប៉ះបារាំង ឬម៉ារ៉ុក នៅវគ្គផ្តាច់ព្រ័ត្រនៅថ្ងៃអាទិត្យ ក្នុងប្រទេសកាតា។

Messi បានដឹកនាំអាហ្សង់ទីនឈ្នះ ៣-០ លើក្រូអាតក្នុងវគ្គពាក់កណ្តាលផ្តាច់ព្រ័ត្រ កាលពីថ្ងៃអង្គារ ហើយនឹងបង្ហាញខ្លួនលើកទី១៧២នៅចុងសប្តាហ៍នេះ ខណៈរូបគេព្យាយាមនាំជម្រើសជាតិរបស់ខ្លួន ឲ្យឈ្នះពានរង្វាន់ World Cup ជាលើកដំបូងចាប់តាំងពីឆ្នាំ១៩៨៦មក។

Messi បានប្រាប់សារព័ត៌មានអាហ្សង់ទីន Diario Deportivo Ole ថា “ខ្ញុំមានអារម្មណ៍សប្បាយរីករាយណាស់ ដែលអាចសម្រេចបានរឿងនេះ។ ខ្ញុំនឹងបញ្ចប់ដំណើរនៃការប្រកួត World Cup របស់ខ្ញុំ ដោយការលេងក្នុងប្រកួតចុងក្រោយរបស់ខ្ញុំនៅវគ្គផ្តាច់ព្រ័ត្រ”។

ប្រធានក្រុមអាហ្សង់ទីនរូបនេះ បានបន្ថែមថា “វាចំណាយពេលអស់ជាច្រើនឆ្នាំហើយ ហើយខ្ញុំមិនគិតថាខ្ញុំនឹងអាចធ្វើវាបានទេ។ ហើយការបញ្ចប់បែបនេះ វគឺជារឿងល្អបំផុត”។

កីឡាករវ័យ៣៥ឆ្នាំរូបនេះកំពុងលេងនៅ World Cup ជាលើកទី៥ ដោយវ៉ាដាច់កីឡាករ Diego Maradona និង Javier Mascherano ដែលបង្ហាញខ្លួនបាន៤លើក។

ជាមួយនឹងគ្រាប់បាល់ទី៥របស់គាត់នៅកាតា Messi ក៏បានវ៉ាដាច់កីឡាករ Gabriel Batistuta ក្នុងនាមជាអ្នកស៊ុតបញ្ចូលទីឲ្យអាហ្សង់ទីនច្រើនជាងគេនៅ World Cup ផងដែរ ដោយរកបាន ១១គ្រាប់។

គួរបញ្ជាក់ថា អាហ្សង់ទីន នឹងត្រូវរង់ចាំជ័យជម្នះរវាង បារាំង និងម៉ារ៉ុក ដើម្បីយកមួយក្រុមឡើងទៅជួបពួកគេ នៅវគ្គផ្តាច់ព្រ័ត្រពានរង្វាន់បាល់ទាត់ពិភពលោក ឆ្នាំ២០២២៕

ប្រែសម្រួល៖ Vann Vann

ប្រភព៖ Reuters

ចុចអាន៖ Messi បង្កើតកំណត់ត្រាអស្ចារ្យយ៉ាងច្រើន ត្រឹមមួយប្រកួតជាមួយក្រូអាត