កីឡា

ថៃ គ្រងជើងឯក AFF Cup 2022 ក្រោយឈ្នះវៀតណាម

បានផុស

៣ years មុន

នៅ

ថ្ងៃចន្ទ ១៦ មករា ២០២៣

ដោយ

ក្រុមបាល់ទាត់ជម្រើសជាតិថៃ បានក្លាយជាម្ចាស់ជើងឯក AFF Championship ឆ្នាំ២០២២ បន្ទាប់ពីយកឈ្នះជម្រើសជាតិវៀតណាមដោយលទ្ធផល ១-០ ក្នុងការប្រកួតវគ្គផ្តាច់ព្រ័ត្រ ជើងទី២ សរុបទាំង២ជើង ៣-២។

ការប្រកួតជើងទី២នេះ ថៃក្នុងនាមជាម្ចាស់ផ្ទះរឹតតែធ្វើបានល្អជាង កាលពីជើងទី១ដោយបានគ្រប់គ្រងបាល់ និងបង្កើតឱកាសស៊ុតលើសំណាញ់ទីរបស់វៀតណាមជាញឹកញាប់ ហើយវៀតណាមក៏មានឱកាសល្អច្រើនដែរ។ ទីបំផុត ថៃ បានបំប៉ោងសំណាញ់ទីវៀតណាមដើម្បីនាំមុខ ១-០ នៅនាទី២៤ ដោយប្រធានជាខ្សែបម្រើលេចធ្លោ Bunmathan។

សម្រាប់ការប្រកួតវគ្គទី២ គ្មានគ្រាប់បាល់កើតឡើងទេ បើទោះជាក្រុមទាំងពីរព្យាយាមវាយសម្រុកគ្នាទៅវិញទៅមក និងមានការផ្លាស់ប្តូរកីឡាករថ្មីចូលក៏ដោយ។ ចប់ការប្រកួតម្ចាស់ផ្ទះថៃទទួលបានជ័យជម្នះ ១-០ ដើម្បីក្លាយជាជើងឯកឆ្នាំ២០២២ដែលមានប្រាក់រង្វាន់៣០ម៉ឺនដុល្លារអាមេរិក។

នៅវគ្គសន្សំពិន្ទុក្នុងពូល ថៃ បានឈ្នះ៣ប្រកួត និងស្មើ១ប្រកួត ហើយវគ្គពាក់កណ្តាលផ្តាច់ព្រ័ត្រ ជើងទី១ ចាញ់ម៉ាឡេស៊ី ០-១ ប៉ុន្តែនៅជើងទី២នៅទឹកដីរបស់ខ្លួន ថៃបានឈ្នះ ម៉ាឡេស៊ី ៣-០។ នៅវគ្គផ្តាច់ព្រ័ត្រ ជើងទី១ ស្មើម្ចាស់ផ្ទះវៀតណាម ២-២ និងជើងទី២ នៅទឹកដីរបស់ខ្លួន ថៃ យកឈ្នះ វៀតណាម ១-០។

ការឈ្នះជើងឯកឆ្នាំ២០២២នេះគឺជាលើកទី៧របស់ថៃ បន្ទាប់ពីឈ្នះ៦លើកកន្លងមក ឆ្នាំ១៩៩៦ ២០០០ ២០០២ ២០១៤ ២០១៦ និង២០២០ ហើយជាក្រុមឈ្នះជើងឯកច្រើនជាងគេបំផុតក្នុងប្រវត្តិសាស្ត្រពានរង្វាន់លំដាប់ទី១តំបន់អាស៊ាន៕