កីឡា

តើ ពេជ្រ សម្បត្តិ បានរៀនអ្វីខ្លះពីបរាជ័យសន្លប់ម្សិលមិញ?

បានផុស

៣ years មុន

នៅ

ថ្ងៃចន្ទ ១៣ មីនា ២០២៣

ដោយ

អ្នកប្រដាល់គុនខ្មែរកំពុងល្បីរន្ទឺ ពេជ្រ សម្បត្តិ បានចាញ់ដោយសន្លប់ជាលើកដំបូងសម្រាប់ការប្រកួតអន្តរជាតិ បន្ទាប់ពីត្រូវបានកីឡាករឡាវ Khampou ទាត់ផ្កាប់ចានចូលកឲ្យសន្លប់បាត់មាត់ឈឹងទឹកទី៣ក្នុងកម្មវិធី«អ្នកប្រយុទ្ធគុនខ្មែរ ស្រាបៀរម៉ាទ្រីដ» កាលពីថ្ងៃអាទិត្យ ទី១២ ខែមីនា ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការពិតនៅលើសង្វៀនបង្ហាញថា កីឡាករឡាវ Khampou មានបច្ចេកទេស និងអាវុធចេញយ៉ាងល្អទាំងព្រមតែម្តង។ រូបគេអាចទាត់ជើងក្រោមក៏ល្អ ទាត់ខាងលើក៏ល្អ ចេញកណ្តាប់ដៃ និងកែងក៏ល្អ។ ចាប់ពីទឹកទី១ រូបគេបានទាត់ជើងក្រោមរបស់ ពេជ្រ សម្បត្តិ ឡើងទ្រេតម្តងៗ។

មិនត្រឹមតែប៉ុណ្ណោះ កីឡាករឡាវរូបនេះចេញកែងមានប្រសិទ្ធភាព និងច្បាស់គោលដៅ ព្រមជាមួយនឹងកណ្តាប់ដៃ និងការធាក់ទល់ធ្វើឲ្យអ្នកលេងគុនខ្មែរពិបាកចូលវ៉ៃឲ្យចំគោលដៅនៅទឹកទី១ និងដើមទឹកទី២។

ទោះបីជាយ៉ាងណា ក្របីព្រៃ ពេជ្រ សម្បត្តិ មិនបានបង្ហាញពីភាពខ្សោយណាមួយឡើយ។ រូបគេនៅតែបន្តដើរចូល និងរក្សាគោលជំហររឹងមាំដដែល។ អាចនិយាយបានថា កាន់ត្រូវ កាន់តែចូល។ ជាពិសេសនៅចុងទឹកទី២ រូបគេបានដើរចូលវ៉ៃលើពោះ និងដងខ្លួនរបស់កីឡាករឡាវឲ្យព្យាយាមថយក្រោយ ស្របពេលកម្លាំងស៊ុហ្វចុះខ្សោយ។

នៅទឹកទី៣ ពេជ្រ សម្បត្តិ បានបន្តវាយសន្ធាប់លើ Khampou។ ទឹកនេះមើលឃើញថា អ្នកលេងគុនខ្មែរវាយពោះរបស់កីឡាករឡាវច្រើន និងមានប្រៀបទៅហើយ។ សម្បត្តិ បានព្យាយាមដើរចូលវ៉ៃដោយគ្មានខ្លាចញញើតដៃគូសោះ។ រឿងនឹកស្មានមិនដល់បានកើតឡើងគឺនៅពេល ពេជ្រ សម្បត្តិ ដើរចូលខ្វះការប្រុងប្រយ័ត្នត្រូវបានកីឡាករឡាវទាត់ផ្កាប់ចានចំកឲ្យសន្លប់ធំតែម្តង។

បរាជ័យដោយសន្លប់ធំជាលើកដំបូងនេះបានធ្វើឲ្យអ្នកតាមដានវិស័យគុនខ្មែរមានបញ្ចេញទស្សនៈរៀងៗខ្លួន។ តាមរយៈបរាជ័យនេះរូបគេមានចំណុចខ្លះដែលត្រូវកែលំអ។

ត្រូវបង្កើនការប្រុងប្រយ័ត្ន ពីព្រោះបរាជ័យលើកនេះបណ្តាលមកពីការធ្វេសប្រហែស។ ទោះបីជាស្ថិតក្នុងកាលៈទេសៈបែបណាក៏ដោយ រូបគេមិនត្រូវមើលស្រាលដៃគូឡើយ ហើយរាល់ពេលដើរចូលត្រូវចេះការពារខ្លួនជានិច្ច។
ត្រូវប្រើភាពឆ្លាតវៃឲ្យបានច្រើនជាងកម្លាំងបាយ។ ពេជ្រ សម្បត្តិ ជាកីឡាកររឹងមាំ អាវុធធ្ងន់ និងកម្លាំងស៊ុហ្វល្អ។ ទាំងនេះហើយជាចំណុចខ្លាំងរបស់គាត់។ រាល់ពេលប្រកួតរូបគេប្រើកម្លាំង និងអាវុធជាគោលចម្បងដើម្បីបញ្ឈប់ដៃគូ ប៉ុន្តែនិយាយពីបច្ចេកទេសនៅស្ទើរ។ និយាយឲ្យចំទៅ រូបគេត្រូវមានគោលជំហរចេញ ចូលអាវុធ និងរបៀបការពារខ្លួនឲ្យបានច្បាស់លាស់។

ប្រសិនបើ ពេជ្រ សម្បត្តិ អភិវឌ្ឍចំណុចខាងលើបានល្អ រូបគេនឹងក្លាយជាកីឡាករជោគជ័យបំផុតក្នុងចំណោមអ្នកប្រដាល់គុនខ្មែរ។

សូមបញ្ជាក់ថា ចាប់តាំងពី ពេជ្រ សម្បត្តិ ប្រកួតដណ្តើមខ្សែក្រវាត់ខារ៉ាបាវ នៅសង្វៀនបាយ័នតាំងពីឆ្នាំ២០២២មក រូបគេមិនដែលចាញ់ពិន្ទុកីឡាករថៃ រួនប៉េ ម្តង និងស្មើគ្នាជាមួយ ឈុត សេរីវ៉ាន់ថង ម្តង។ ក្រៅពីនោះផ្តួលដៃគូឲ្យសន្លប់ទាំងអស់៕

អត្ថបទ៖ វីរបុត្រ